Lawngtlai, September 11, 2022 : September 5, 2022 a Thliarpui leh Thliarte inkara chesual Tuipui Ferry khua, B. Rozamliana ruang zawn hna chu MTP Tuipui Ferry te pui turin CYLA ruahmanna angin kalpui mek zel a ni a. Vawiin lamah Lawngtlai Town Branch atangin YLA College Veng Branch, YLA AOC Branch leh YLA Thingkah Branch te tuitla zawngin member thahnem tak an thawkchhuak a. YLA AOC Veng Branch ten MTP Tuipui Ferry te hnenah Diesel 20 litres an pek bakah tuitla chhungte ralna Rs. 2,000/- an pe bawk.
Vawiin lamah chanchin dang a awm avangin YLA College Branch leh YLA Thingkah Branch te Liapha lamah an kal a, YLA Rulkual Branch te pawh an kal nghal bawk. Tin, YLA Hruitezawl Branch te leh Tuidangchhuah Branch te pawhin Lungmawi chhak lipui vel a ruang an hmuh fo na thin an vil leh mek a, theihtawp an chhuah ve mek. Tin, YLA Rulkual Branch chhunga Liapha Section lam pawhin an khaw bul tuipui kam vel an vil reng bawk.
Vawiinni hi CYLA in tuitla zawn hnatlang routine a siama a tawp ni a ni a, Tuipui Ferry lamah CYLA President Pu Hc. Vanlalruatpuia leh Joseph Lalhmingthanga GS, CEC Tv. C. Lalhmachhuana, Tv. Hc. Malsawmtluanga te kalin tawpna hun YLA AOC Branch te nen siam a ni a. Liapha lamah CYLA Adviser Pu Thathluna Chinzah hoin AGS, Treasurer, Fin. Secretary leh CEC member thahnem tak leh YLA College Veng Branch leh YLA Thingkah Branch ten tuitla zawn hnatlang an titawp bawk. 'Tuitla hi la hmuh ni lo mahse kan Society danin Ni 7 chhung khawtlang huapa zawn tih kha kan zawm dawn avangin CYLA ang chuan duty tih tawp a ni' tih CYLA Gen. Secretary Pu Joseph Lalhmingthanga chuan a sawi.
MTP Tuipui Ferry President Pu Rorela sawi danin, Kawlchaw lam atangin ruang ang deuh tuia lo len thla an hmuh thu an dawng tih sawiin, a hmunah kal nghal niin, B. Rozamliana ngei a ni tih finfiah a ni lo a ti a. MTP Tuipui Ferry President chuan naktuk tlai lam dar 2 ah a nawlpuia tuitla zawn hna chu an tihtawp tur thu a sawi a, an kal zel dan tur la rel a ni ang a ti.
Vawiin hi Tv. B. Rozamliana tui a tlak ni atanga chhiar in a ni 7-na a ni a, YLA hnatlang ni 6-na a ni bawk a, tuitla hi zawn hna thawh mek zel a ni.
Post a Comment