Rauthla, August 9, 2022 : Vawiina Assam Sorkar hotute nena ramri chungchang an sawi turah Home Minister, Pu Lalchamliana chuan Assam lamin eng thu nge an lo ken dawn an la hriat lawk loh avangin Mizoram pawhin eng thu nge an ken dawn tih sawi lawk theih a la ni rih lo tih a sawi.
Home Minister chuan, Assam hotute chu naktuka ramri chungchang an sawi ho turah eng thu nge an rawn ken dawn tih an zuk zawt a, a chhanna an la hmuh loh avangin an thu leh hla la ngaihchan mek a nih avangin an rawn ken tur hriat theih a la ni rih lo tih a sawi. Pu Lalchamliana chuan, Assam lam thu lo ken tur chu a har viau thei a, a lo awlsam viau thei bawk a, engmah hriat lawk a la nih loh avangin eng lam hawia inbiakna hi kalpui tur nge tih sawi lawk theih a la ni lo, an thu lo ken a zirin Mizoram lam pawhin an thu ken tur chu an lo siamrem ve mai dawn tih a sawi.
Hemi hmalam hian Home Minsiter Pu Lalchamliana hian ramri chungchanga inbiaknaah Mizoram tanfung tur chu BEFR 1875 a nih thu te, hei hi Dy Chief Minsiter Pu Tawnluia kaihhruaia All Party meeting-in an lo rel tawh a nih thu te leh inbiakremna zawn theih a ni ang ti ang deuha rilrua an dah thu te a lo sawi tawh a ni.
Vawiin hian Assam Border Area Development Minister Atul Bohra leh a thuihhruai mi panga ten Aizawl an lo thleng dawn a, chawhnu 3:30 ah Aijal Club-ah Mzioram sorkar aiawhte nen ramri chungchang an sawiho nghal dawn a ni. Mizoram aiawhte hi Home Minister Pu lalchamliana’n a ho ang a, Information Minister Pu Lalruatkima leh Home department hotu ten an tawiawm ang.
Post a Comment