Rauthla, August 9, 2022 : Commonwealth Games 2022-a India tana Gold medal la tu Jeremy Lalrinnunga chuan nimin khan Mizoram alo thleng a, Sports Department huaihawtin ropui taka hmuah a ni.
Commonwealth Games, 2022 Birmingham-a neiha India tana Gold medal la tu leh Mizoram tana Gold medal la hmasa ber tu Jeremy Lalrinnunga hi nimin chawhnu dar 2 leh chanve khan Lengpui Airport alo tum a, he hunah hian Sports Minister Pu Robert Romawia Royte leh Mizoram Sawrkar mi pawimawh dangte leh Sports Discipline hrang hranga infiammite, Sports Association hrang hranga hruaitute leh mipui thahnem takin an lo hmuak a. Amah lo hmuaktu zingah hian a nu leh pa leh a unaute pawh an tel a ni.
Jeremy Lalrinnunga hmuahna inkhawm tawi Lengpui Airport hungchhunga chawlhbukah buatsaih a ni a. He hunah hian inlawmna thusawitu Sports Minister Robert Romawia Royte chuan Mizoram atanga India aiawha infiammi zinga la thleng sang ber Jeremy Lalrinnunga chuan Mizoram a ti hmingtha tak zet a. Zoram mipui ten an chhuang tih sawiin sawrkar ang pawhin an chhuan thu a sawi a, Mizoram Olympic Association hruaitu a nihna angin infiammite zawng zawng aiawhin a lawmpui thu a sawi bawk.“ Sports Minister chuan vawiina Jeremy puala programme buatsaih chu Mizoram ti hmingthatu hmuahna leh a hlawhtlinna la lawmsak tur aitechhinna a ni a ti a. CWG a India aiawha Bronze Medal la tu Lalremsiami rawn thlen hunah Sawrkarin ropui takin CWG Gold Medalist leh Bronze Medalist te lawmpuina hun a buatsaih dawn a ni a ti.
Jeremy Lalrinnunga chuan chanchinbu mite zawhna chhangin kum 2024-a Paris khawpuia Olympic awm turah a inbuatsaih tan dawn tih a sawi a, Commonwealth Games-a kg 67 inelna huang a telna chu Paris ah a awm tawh dawnloh avangin kg 73 huanga tel turin a inbuatsaih dawn tih a sawi a, ram tana Medal la ngei thei turin theihtawp a chhuah dawn tih a sawi bawk.
Post a Comment