Lawngtlai, August 26, 2022 : Art & Culture Department, LADC in LADC Golden Jubilee puala hla inphuah siak (LADC Theme song) a buatsaiha lawmman pakhatna dawngtu Pu LZ. Ringlawt in Music Video a buatsaih chu vawiin khan CEM Conference Hall-ah Pu V. Zirsanga CEM LADC chuan a tlangzarh.
Pu V. Zirsanga CEM LADC chuan LADC in Golden Jubilee (Kum 50) lawmna a hman mek thu leh a hawnna programme pawh ropui taka hman a nih tawh thu a sawi a. LADC Golden Jubilee lawmna hun kan hman mek lai a, Pu LZ. Ringlawt in LADC Theme song hla a phuah mai bakah, music Video mipuite hmuh theih leh en theih tura a lo buatsaih thei hi a lawmawm tak zet a ni a ti. He hla satu, B. Lalthachhingi chu thiam a tih thu leh, LADC Golden Jubilee tihlutu leh ti ropuitu nia a hriat thu a sawi a, an thawhrimna leh Ram leh hnam tana an inpekna avangin lawmthu a sawi bawk.
Pu V. Zirsanga CEM chuan, "Hla hi kan lunglen changa phurna leh beiseina tharte kan khawhar laia min hnem thintu leh thlamuana min pe thintu a ni fo thin a, a hla thu a zirin beiseina leh phurna min pe a, chona thar min pe thintu a nih avangin, hla phuahtu leh hlasa thin zaithiamte hi an hlu em em a, an fakawmin chawimawi pawh an phu hle thin a ni, a ti.
Hlaphuahtu Pu LZ. Ringlawt chuan LADC in Theme song a la nei lo chu a rilruah a awm reng thu a sawiin, Art & Culture Department, LADC in Golden Jubilee lawmna puala Theme song inphuah siak an buatsaih chu a lawmawm a tih thu a sawi bawk.
Post a Comment