Lawngtlai, August 26, 2022 : Vawiin khan Dr. Beiparysa K., District Medical Superintendent, District Hospital Lawngtlai kahhruaiin a room-ah Central YLA hruaitute leh District Hospital Lawngtlaia Doctor dah thar te an inkawm.
Dr. Beiparysa K chuan, Central YLA ten Lawngtlai damdawiin an ngaihven a, an ngaipawimawh chu lawmawm a tih thu a sawiin, Damdawiin hna mai piahlamah Kohhran leh khawtlang hmasawnna leh thiltih pawimawh thleng pawh a inlungrual taka thawkho tur kan ni a ti a. Doctor te pawh mihring ve tho niin, famkimlohna tam tak an nei a, chungte angah chuan khawtlang hruaitu ten hriatthiamna zau tak nena en a, an chaklohna leh duhkhawp lohna lai te pawh thahnemngai taka hrilh hre zel turin a chah a. Inlungrual taka thawhho puiah CYLA chu a sawm a ni.
Pu C. Thangmama, Central YLA Vice President chuan doctor thar lo awm te chu Lawngtlai mipui ten an lo lawm tih a sawi a, kan district hi hriselna lama hnufual tak leh dawmkan ngai tak kan ni a. kan mamawh a, Lawngtlai district hian in theihna leh thiamna te mamawh a ni. Chuvangin nangni pawhin tih takzet leh taima taka he hna hi rawngbawlna a ngaia thawk turin kan beisei che u a ni, a ti.
Pu Joseph Lalhmingthanga Chinzah, Central YLA G/S chuan harsatna leh buaina hrang hrang karah, mi thenkhat ten Lawngtlaia awm an hreh ngawih ngawih laia anni pathum, Lawngtlai damdawiina thawk tura an rawn penchhuak chu lawmawm a tih thu leh anmahniah Lawngtlai District-in beiseina sang tak a neih thu a sawi a. Lawngtlai district tana theihtawp chhuah turin a ngen bawk.
He inkawmhonaah hian Tunhnaia District Hospital Lawngtlaia doctor dah thar pathum- Dr. Lalramhluna Tochhawng (Otorhinolaryngologist), Dr. Vanlalrini Sailo (Obstetrics & Gynaecologist), Dr. K. Vanlalhriati (Paediatrician) te leh Central YLA atangin Pu C. Thangmama, Vice Preident, Pu Joseph Lalhmingthanga Chinzah, General Secretary, te bakah Pu T. Rohlupuia leh Pu Rammawizuala Renthlei, President, YLA Electric Veng branch te an tel a ni.
Post a Comment