Rauthla, August 3, 2022 : Mizo Zirlai Pawl (MZP), Gen. Hqrs. chuan Cooperation Department hnuaia Lalrinsanga, Additional Registrar of Cooperative Societies (RCS) pension tawh rawih nawn tha a tih loh zia lantir nan leh Pension rawih nawnna order sut phutin nimin chawhma khan Registrar Cooperative Societies office kawtah a pisa kai tur an dang.
Lalrinsangsa, Addl. RCS (Rtd) Pension rawih nawn hian ni thum chawlh a lak avangin pisa kai tur dan hi chawhma dar 11 khan tihtawp lailawk a ni. Hemi chungchanga hmalak chhunzawm zel dan tur ngaihtuah hian nimin chhun dar 12 khan MZP General Headquarters, Aizawl Emergency meeting neih nghal a ni a. Meeting ah hian MZP hruaitute leh Aizawl khawpui chhung College hrang hrang SU an tel.
MZP chuan Additional RCS pension tawh rawih nawn chungchangah mimal induhsakna uchuak tak leh puan hnuai thil tam tak a awm nia an hriat thu an sawi a, pension ruai nawn lo tura a ngenna ngai pawimawh lo a hmalatu Cooperation minister Pu C. Lalrinsanga leh he department hnuaia rawih nawn mek Pu Lalrinsanga, Addl. RCS (Rtd) te chu MZP chuan a dem takzet tih sawiin an thil phut a hlawhtlin hma chu theihtawp an chhuah dawn tih an sawi bawk.
Meeting chuan August 4, 2022 ral hma ngeia pension rawih nawn a nihna thupek hi sut turin a phut a, thupek sut a nih loh chuan August 5, 2022 (Zirtawpni) ah Registrar Cooperative Societies pisa kai tur dan leh an tum a. August 8, 2022 (Thawhtanni) ah Cooperation Department minister C. Lalrinsanga pisa kai tur dan an tum bawk. Hei bakah hian Zirlai, Thalai leh mipui tam thei ang ber nen kawng zawh an tum bawk.
Hetih lai hian Pu Lalrinsanga chuan chanchinbu mite zawhna chhangin Re-employment anih na ah tumah dip dal a neilo ati a, Order pawh a chung lama mi te siam anih thu sawiin amahin rawih nawn leh a dil lo a, department hrang hrangah pawh pension tawh rawih nawn an nithin a, sawrkar atanga order sutna a awm anih loh chuan in hnuhdawh a tumlo tih a sawi.
Pu Lalrinsanga chuan Co-Operation Department a dan anga kal duh lo te hmalakna anih thu sawiin Dan an neih sa Chairman leh Board of Director post term 2 kum 10 chhung chu thenkhatin duhlo in an Dan neihsa chu paih an tum a, hemi kawngah hian Dan neihsa paih tum tuten hnawk an tih avanga MZP kaltlanga bei an ni tih a sawi bawk.
Post a Comment