Rauthla, August 3, 2022 : Lawngtlai nula zaithiam Latei Hringngen chuan a hla thar ‘Lungliami’ tih chu Honda BigWing Thazual Lengzem chart-ah pakhatna a nihpui.
‘Luangliami’ hi ama phuah niin July 1, 2022 khan YouTube-ah a dah chhuak a, thlirtu pawh an pung chakin nimin thleng khan nuai hnih leh sing li chuangin an thlir tawh a ni. Lateii zai hian ngaihno a bei a, ngaihthlak a hahdam thin. Tuna a hla thar, chart topper a nihpui mek ‘Luangliami’ pawh hi a hla dang ang bawkin ngaihthlak a hahdamin a mawi lehpek hle a, Music Video hmuh nuam tak nen tichhuakin chart topper a nihpui hi a phu. Music Video simple tak si, a hla nena inmil em em in a music video te hi a buatsaih thin a, a hla te hi Thalai tena an hriat reng theih nana vawn leh hriat awlsam, nalh em em si a ni. Zai lama Lawngtlai min tihmingthatu ber pakhat a ni.
Latei Hringngen hian zai zirna em em nei lovin, a tet te atangin zai hi a tui a, Kohhran lamah leh High School velah te a zai lawp lawp thin. Zoram khawvelin an hriatna chu Zorimawi Youtube channel-a a music video dah ‘Lungrunpui’ tih chu a ni a, he hla hian entu (viewer) nuai 18 chuang a nei tawh a ni.
Hemi hnu hian a music video pahnihna tur ‘A tha vek e’ tih siamin, he hla hi a hit hle a, tun dinhmunah viewer nuai 22 chuang an awm tawh.
Zaithiam dang ang lo takin Latei Hringngen hian hlaphuah a thiam a, a hlate hi a ma phuah vek niin, a thluk pawh hi ama siam vek a ni a, tuna Luangliami’ tiam hian Music Video pathum a sual chhuak tawh a ni.
Latei Hringngen hi a hming pum chu H. Vanlaldinchhungi a ni a, unau pathum niin, a nu leh pa, H. Vanlalchhunga leh V. Vanlalthangi te nen New Vengpui, Lawngtlaiah an khawsa mek.
Post a Comment