Rauthla, August 5, 2022 : Mizoram Sawrkar chuan Sawrkar sum harsatna thleng mek chungchangah mipuite chi ai lo tura chahin tun thla ni 10 velah pension hlawh leh sawrkar hnathawk hlawh pek chhuah tum anih thu nimin khan thuchhuah siamin a tarlang.
Information and Public Relations Department kaltlanga Sawrkar Finance Department thuchhuah tarlan danin Sawrkar sum harsatna thleng mek chu kum 2019 atanga 2020 tawp lam leh nikum sawrkar kuma sum dawn tur dawn loh tam tak a hlawm lian ringawt pawh cheng vbch 2632 leh nuaih 58 lai a awm vang te, Covid- tanpuina dawn ni mahse cheng vbch 100 pawh a tling thathum lo thin tih sawrkar chuan a sawi a, hetihlai hian hrileng avangin ruahman lawk lohva sum hmanna a tam a, a nghawng tuar chho zelin CSS sum pawh duh anga hmaa pek chhuah theih loh chang a awm fo tih a tarlang.
Sawrkar chuan CSS Fund pek chhuah dan kalphung tih danglam vangin tun chawlhkar hnih chhung lekin cheng vbch 610 leh nuaih 69 pek chhuah niin hun reilote chhunga heti zat pek chhuah vanga sawrkar sum a indaih loh avangin Ways and Means Advanced, Special Drawing Facility hmangin RBI ah sum puk a ni a, hei hian ala daihloh avangin Overdraft hmanga sum puk a ni bawk a ti a, hetianga sawrkar sum dinhmun a chhiat chhoh tak zel avang hian dinhmun chhe zawka a awm loh nan Treasury atanga sawrkar sum chhuak te chu nasa taka tih tlem anih thu a tarlang a, Treasury khar erawh ala nilo a, a tul zual bik pek chhuah reng a la ni a, tun hmaa sum pukna National Small Saving Fund leiba te pawh RBI kaltlanga rulh reng ani tih thuchhuah ah a tarlang bawk.“ Sawrkar hnathawk hlawh chungchangah sawrkar chuan sum luh theihna dang dapin chhiah bakah Central sawrkar atanga sum pek thar tur leh pek mek atangin July thla hlawh pek thuai tum anih thu a sawi a, Muster Roll leh work charge te hlawh chu August ni 5 hian pek chhuah nghal vek ni se a tih bakah pension leh sawrkar hnathawk te hlawh pawh August ni 10 velah pek chhuah tum anih thu a sawi bawk.
Mizoram sum harsatna chu thla 4 hnu velah a ziaawm beisei anih thu leh CSS share installment a luh thuai beisei a ni a ti a, mipuite chu chi ai lova social media thu thehdarh te pawh awih dan chin tawk nei thiam turin a chah bawk a ni.
Post a Comment