Lawngtlai, August 8, 2022 : Vawiin khan Lawngtlai District Election Officer, Lawngtlai Bawrhsap Pu Amol Srivastava chuan Lai Autonomous District Council (LADC) hnuaia village council (VC) pangaa by-election buatsaih tura hman tur final electoral roll chu Lawngtlai DC Conference Hall-ah a tlangzarh a. Final electoral roll hi political party ai awhte hnenah a hlan nghal.

Pu Amol Srivastava chuan by-election neih tura hman tur draft electoral roll chu July ni 26-a tlangzarh a nih thu sawiin, hun chep tak kara final roll felfai tak peih fel leh tlangzarh theih a ni chu lawmawm a tih thu leh thawktute thawhrimna fakawm a tih thu a sawi.

LADC hnuaia VC by-election neih turah hian 11-Ngengpuikai, 47-Dumzautlang leh 57-Vaṭhuampui VC Constituency-ahte general seat pakhat ṭheuh hnawh khah tur a awm a; 46-Hmawngbuchhuah leh 48-Laitlang VC Constituency-ahte general seat pathum ve ve leh reserve seat pakhat ve ve hnawh khah tur a awm thung.

Final electoral roll aṭanga a lan danin, Ngengpuikaiah vote nei mi 528 (mipa 272 leh hmeichhia 256) awmin, draft roll aṭangin mi 7-in vote nei an pung a; Hmawngbuchhuahah vote nei mi 208 (mipa 95 leh hmeichhia 113) awmin, draft roll nen a inzat a; Dumzautlangah vote nei mi 147 (mipa 83 leh hmeichhia 64) awmin, draft roll aṭangin 4-in a kiam a; Laitlangah vote nei mi 134 (mipa 75 leh hmeichhia 59) awmin, draft roll aṭangin 7-in a kiam a; Vaṭhuampuiah vote nei mi 825 (mipa 437 leh hmeichhia 388) awmin, draft roll aṭangin 1-in a kiam ve thung a ni.

He hunah hian Election Officer Pi B. Malsawmtluangi bakah, Assistant Electoral Registration Officer-te, political party leh tlawmngai pawl ai awhte an tel a. By-election chungchang thil pawimawh hrang hrang sawi ho nghal a ni.

Post a Comment

Powered by Blogger.