Rauthla, August 3, 2022 : Mizoram Pradesh Congress Committee (MPCC) chuan, July thla chhunga SEDP sem a nih tur thu sawitu Dy CM Tawnluia’n thupha chawi rawh se, an ti a, MNF Party chhungah leh thingtlang kuthnathawktu rethei tak tak te rilruah beiseina sang tak a siam a, SEDP tanpuina Rs. 50,000/- dawn mai inbeisei chhungkaw sang tam tak an awm a ni, a ti.

MPCC Media Department te chuan vawiin kan Aizawl Press Club ah thuthar lakhawmtute kawmin Deputy Chief Minister Pu Tawnluia’n Khawhai Town Hall-a Tuichang South MNF Block Conference June ni 28 –a neih ah chhungkaw sing 6 hnenah SEDP tanpuina cheng sing 5 zel pek anih tur thu leh kumin July thla chhungin DC tin atangin pawisa an sem chhuak theih tawh tur anga sawi chu vawiin thlengin SEDP dawng sawi tur pakhat mah anla awmlo an ti a, July thla-a SEDP sem anih tur thu chiang taka sawia MNF Party worker te leh mipuite hnena beiseina sang tak pe a, ti hlawhtling leh si lo tu Pu Tawnluia chu mipui hma ah thupha a chawi ngei turah an ngai tih an sawi.

MPCC chuan MNF sawrkarin budget-a kum 4 chhunga SEDP atan sum a dah cheng nuai hlir nuai 1 sing 9 sang 130 chu a tam tawk tih sawiin Chief Minister Pu Zoramthanga’n sem a harsat loh turzia chiang takin a sawi bakah Deputy Chief Minister Pu Tawnluia’n July thla chhung ngeia sem anih tur thu a sawi bawk a, SEDP pawisa pawh budget-a dah sa anih avangin an duh phawt chuan sem tur a awm ngeiah Congress party chuan an ngai tih an sawi a, heti chunga SEDP sum cheng khat pawh sem ala nilo chu mipui zah lohna ah an ngai tih an sawi bawk. 

Post a Comment

Powered by Blogger.