Rauthla, August 19, 2022 : Commonwealth Games 2022 neih zawh taka Indian tan bronze medal latu hockey player Nl Lalremsiami chu Mizoram Journalist Association, Kolasib District chuan an kawm a, "Khawvel infiamna lian thama medal te chu midang ta tur chauh ni lovin Mizo te pawhin kan awrh ve thei a, medal awrh zel turin tuna medal hi thalaite tan a bultantu chauh a ni tih hria se ka duh," a ti.

Kolasib Press Club-a inkawmna hun hi Pu Zairemchhunga, Gen Secy, MJA Kolasib District chuan a kaihruai a, Nl Lalremsiami chuan MJA te chungah lawmthu sawiin a chanchin an puanzar sak thin chuan hmun hla zawka mite pawhin an hriat phah a, an inkhelh chanchin te an hre thei tih a sawi. "Hockey ka khelh tan tirh atang tawhin tun thlengin min thlawp a hi ka lawm a, ka kal lehzelna turah pawh min tawiawmna ka ngen bawk che u a ni," tiin a tana hun bik siamsak a ni chu lawmawm a tih rualin a phu lo a tih thu a sawi a, hriselna pe tu Pathian chungah lawmthu a sawi bawk.

Nl Remsiami chuan medal a lak chu Mizo mipuite hlawhtlinna a nih thu a sawi a, "He hlawhtlinnaa ka sawi hmaih theih loh chu Mizoram mipuite an ni a, engkimah a bul atangin min tawiawm tha em em a, kan inkhel dawna min tawngtaipuina te ka hrereng thin. Keimah pawhin inrintawkna ka neih phah thin a, ka hlawhtlinna hi keima mimal hlawhtlinna ni lovin Mizo mipuite, Mizoram mipuite hlawhtlinna a ni. Heng zawng zawng hi nangmahni vanga thleng thei a ni," a ti.

Birmingham khawpuia neih zawh tak Commonwealth Games 2022 ah khan Mizoram atangin Tv Jeremy Lalrinnunga nen telin medal an la ve ve a, hemi chungchangah hian Remsiami chuan, "Mizo pahnih telten medal kan hawn ve ve thei hi a ropui ka ti. Infiamnaah Mizo te hi kan hun a thleng ve tawh niin ka hria a, CWG mai nilo, Olympics te, Asian Games-a medal te hi midang ta tur chauh a ni lo. Keini Mizo thalaite hian kan awrh ve thei a ni tih chiang takin a lang a ni," a ti a, a medal lak chu Mizo thalaite tan a bultanna chauh a nih thu leh sports-ah chauh ni lo, zirna kawngah te pawh Mizoram tan tia theihtawp chhuah turin thalaite a sawm a ni.

He hunah hian pa anga an en Pu Andrew VL Auva, president, MJA Kolasib district pawhin thu sawiin Remsiami chuan hlawhtlinna chang turin harsatna tam tak a paltlang tih a sawi a, "Mi tam tak angin beidawng hma nise, a tan hian tawpna tur hi a tam tawh lutuk," a ti. Remsiami nunah chapona a awm lo nia a hriatthu leh tute pawh hlim hmel pu takin a be reng thei tih a sawi a, hemi rual hian Mizo mipuite, sorkar leh NGO ten hlawhtlinna changte inchawimawina chang kan hria chu hmasawnna tha tak a nih thu leh chhunzawm zel tlak a nih thu a sawi.

He hunah hian chanchinbu mite nen inkawmhona neih a ni a, MJA te pawhin a kalzelna turah duhsakna an hlan a ni.

Nl Lalremsiami hi FIH Womens Hockey Series Final, Hiroshima-ah semifinal-a Chile an hmachhawn dawn, June 21, 2019 khan a pa, Pu Lalthansanga Zote in heart attack vangin a boral san a, hemi tum hian India chu champion niin final-ah a thlengtu Japan chu 3-1 in an hneh a ni. Zirna lamah tunah hian Govt Hrangbana College-ah BA 6th semester a zir mek bawk.

India ram tan vawi 87 khel tawh a, goal 25 khung tawh Nl Lalremsiami hi zanin hian rit chawi chak, CWG 2022-a gold medal latu Tv Jeremy Lalrinnunga nen Aizawl Vanapa Hall-ah sorkarin an tan hun a buatsaih a, MJA te nen inkawmna neih zawh hian hemi hmang tur hian a kal chho lehnghal a ni.

Post a Comment

Powered by Blogger.