Rauthla, August 02, 2022 : Mizo Zirlai Pawl (MZP), General Headquarters chuan Cooperation Department hnuaia pension rawih nawn tha a tih loh zia lantir nan nimin chhun khan Vanapa Hall kawtah pension rawih nawnna order an hal. Pension-a rawih nawnna tur order copy, May 25, 2022 a siam tawh hi MZP president Lalnunmawia Pautu chuan a hal a ni.
Mizoram sawrkarin Cooperation Department hnuaia pension a rawih nawn hi Lalrinsanga, Additional Registrar of Cooperative Societies (Addl. RCS) niin May khan a pension a, a hmun ruak luah tur hian sawrkarin Maria G. Ralte a dah a, Maria G. Ralte hi July thla khan a pension ve leh a ni.
MZP President Lalnunmawia Pautu chuan thu sawiin, “Mi bik leh thiam bikna pawh nei lo, mimal induhsakna uchuak tak avanga sawrkarin thawktu pension a ruai nawn hi thalaite kawng daltu a nih avang leh sawrkar sum tam tak luanralna a nih avangin MZP chuan kan ngai thiam thei lo a. Ruai nawn lo tura vawi tam kan ngen hnuah pawh pension rawih nawn kaltlangpui a ni hi kan dem tak zet a. A tawp thlengin kan do zel dawn a ni.“ a ti.
Sawrkarin Addl. RCS pension tawh Lalrinsanga rawih nawn leh a tumna hi MZP chuan mimal induhsakna uchuak tak leh puanhnuai thil tam tak a awm niin an ngai a. Vawiin August 2, 2022 hian Mizoram sawrkarin pension tawh a rawih nawn leh tum Lalrinsanga, Addl. RCS (Rtd) chu a office kai tur dan an tum. MZP chuan ngenna a hlawh tlin lo a nih chuan kal zel an tum tih an sawi.
Post a Comment