Rauthla, July 25, 2022 : Eiruk thubuaia thiamloh chantir tawh Tuichawng bialtu MLA Dr. BD. Chakma, CADC CEM ni mek Budha Lila Chakma leh CADC Executive Member, MDC ni mek leh MDC hlui mi pakua, an vaiin mi 13 te chu, Special Judge (PC Act) chuan vawiin khan hremna puangin, kum 1 chhung jail tang tur leh Rs. 10,000 theuh chawi turin a ti a, hetihlai hian thiamloh chantir mi 13 te hi ni 90 chhung atan bail a chhuah lailawk an ni a, chumi atan chuan (bail bond) Rs. 20,000 theuh chawitir an ni.
Tarlan tawh angin, sawrkar sum eiruk thubuaiah CADC-a chief executive member (CEM) hlui leh Mizoram MLA ni lai Dr. BD Chakma leh CADC CEM ni lai Buddha Lila Chakma bakah, MADC-a MDC ni lai thenkhatte chu July ni 22, 2022 khan thiam loh chantir an lo ni tawh.
Kum 2013-2014 vela Chakma Autonomous District Council hnuaia hmasawnna tur sum sorkar laipui atanga an hmuh Rs. 1,37,10,147 dan loa an hlawh atana an lo hman thubuaiah Aizawl District Court-a Special Judge (Prevention of Corruption Act) Vanlalenmawia chuan thutlukna a puang a, mi 13-te chu thiam loh a chantir a ni.
Hetih lai hian Tuichawng bialtu MLA Dr BD Chakma chu Mizoram Legislative Assembly member zinga court-in a convict hmasa ber nia a hriat thu Assembly Speaker Lalrinliana Sailo chuan sawiin, convict a nih avanga MLA a nihna atanga disqualify theih a nih leh nih loh chu uluk taka zir a nih tur thu a sawi a. Speaker chuan court-in eiruk thubuaia Dr BD Chakma a convict chungchang chu law minister pawh a hrilh hre nghal tih sawiin, convict a nih avanga disqualify a nih theih leh theih loh dan chu assembly secretariat-a official-te nen uluk taka an zirho tur thu sawiin, “Expert-te pawh thlirtir kan tum ang,” a ti.
MLA zingah eirukna emaw, thil dang emawah court-a inhek an awm fo thin a, thubuai nei pawh an awm nual tih speaker chuan a sawi a, chutihrual erawh chuan court-in thiam loh a chantir tak erawh chu Dr BD Chakma tih loh mi dang Mizoram MLA zingah an awm a hriat loh thu a sawi a ni.
Post a Comment