Rauthla, July 25, 2022 : Sports Minister Pu Robert Romawia Royte chuan social media hman kawngah fimkhur turin zirlaite a chah a, Social media chu midangte sawisel leh diriamna atan ringawt kan hmang ang tih a hlauhawm a ti.
Government Zirtiri Residential College ten vawiina Vanapa Hall, Aizawl-a Freshers’ Social an neihna a hmanpuinaah Sports Minister chuan social media chu mi tamtakin dinchhuah nan leh hausak nan an hmang a, mizo thalaite pawh hian kan ti ve thei a ni, a ti a, fimkhur tak leh hmasawnpuina atan chauha hmang turin zirlaite a fuih.
Pu Robert Romawia Royte chuan Infiamna lamah mizo thlai India ram pum huapa lar leh India ram aiawha feh chhuak an awm teuh tawh tih sawiin, infiamna mai bakah thiamna kawngahte leh thil dang chi hrang hrangah ramm leh hnam rohlu ni turin theihna an nei tih a sawi a, taksa inenkawl uluk a ‘fit’ taka awm reng turin a chah bawk a, taksa a in fit that tawk loh chuan hlawhtlinna eng pawh chang ila a a famkim tawk thin lo a ni, a ti.
Government Zirtiri Residential College hi Mizorama Science College hmasa ber niin June, 2000 khan din a ni a. Science, Home science leh Computer Science zir theih niin, kumin March thla khan NAAC Accreditation Grade ‘A’ an hmu a ni.
Zirlai lut thar (freshers’) 334, Third semester zirlai 350 leh Fifth semester zirlai 262, an vaiin zirlai 946 an awm mek a, November, 2021 khan an school campus thar, Durtlang Leitan-ah Science leh Home Science la te an in sawn chho a, college building hlui Ramthar Veng, Aizawlah Computer Science zirlaite an awm chhunzawm rih a ni.
Post a Comment