Rauthla, July 25, 2022 : Vawiin khan Serchhip Auditorium-ah MNF Serchhip East Block huaihawtin Public Meeting neih a ni a, he hun hi MNF President Zoramthanga chuan chuan hmanpuiin, kum 2023, Mizoram Legislative Assembly inthlanpui neih turah, Serchhip Assembly Constituency-a MNF Party atanga ding turin J. Malsawmzuala Vanchhawng chu lungrual takin an thlang tih a puang a, amah pawh a bial ngai Aizawl East I ah a ding nawn dawn tih a sawi bawk.
CM Zoramthanga chuan, tun ang boruaka an kal zel chuan ZPM in seat 10 an lak phak a rin loh thu sawiin, an seat neih mek pawh an hum zo ang em tih ngaihtuah tham a nih thu a sawi a. Delhi chakna eng hmang Congress chu khulamah a burpui a tlu a, helamah a phita a rawp ral zel mai a ni. An lenna ber thin Hmarchhakah an phita a rawp ral zel a ni a ti. Pu Zoramthanga chuan Pathian leh mipui zarah nakkumah MNF chuan seat 30 lak tlin ngei an tum thu a sawi bawk.
J. Malsawmzuala Vanchhawng chuan nakum 2023-ah MNF party chuan tualto party zingah elpui tham a nei dawn lo tih sawiin, 'Mizoramah tualto party pahnih lian a awm thei lova, National party pawh Mizoramah a lian pahnih a awm rual thei lo' a ti a. 'Bial chhung mi ka nihna zawnah theihtawp chhuah ka chhuah ang' a ti bawk.
Post a Comment