Rauthla, July 14, 2022 : Sihtlangpui khuain vawiin khan an khua Hmeichhe Volleyball team-in Volleyball tournament hrang hranga tum 20 an champion tlin lawmna Sihtlangpui Playground-ah an buatsaih a, he hun hi Pu V. Zirsanga, CEM LADC chuan khuallian niin a hmanpui a, LADC a SYS Department changtu EM Pu C. Hrangthianga chu khualzahawm a ni.
Khuallian Pu V. Zirsanga chuan hlawhtlinna kalkawngah leh eizawnnaah tawrhchhelh a ngaih thu sawiin, infiammi thenkhat chuan in chhungkhur chhuah san harsa kan ti thin a, hei hi hlawhtlinna daltuah kan hmang tur a ni lo a ti a. 'Kan thil tihna reng rengah a thiam thei pawl nih ringawt hi hlawhtlinna a ni kher lova, tih tak meuh va, hrat laka tumruhna nena bei hram hramte hian hlawhtlinna an chang fo zawk thin, inpumpekna nen Pathian hrereng chunga kan thawhrim phawt chuan hlawhtlinna kan chang ngei ngei ang' a ti bawk.
Khualzahawm Pu C. Hrangthianga EM (SYS) LADC chuan Pu V. Zirsanga kaihhruai LADC sorkar chuan infiamna lamah theihtawp chhuahin hma an la mek tih a sawi a. A thiam leh tling an awm phawt chuan tumah kan en hrang dawn lo tih sawiin, eizawnna tling leh nghelnghet an neih theih nan hma kan la zel dawn a ni a ti.
Post a Comment