Lawngtlai, July 14, 2022 : NHM Employees Union Mizoram (NEUM), Lawngtlai District chuan 'Dinhmun derthâwng tak hnuaiah chuan tu nge a hna phûr taka thawk thei ang ni? tiin NEUM in nawrh an huaihawt mek chu an zawm chhunzawm dawn tih an sawi.
NHM Employees Union Mizoram (NEUM), Lawngtlai District chuan thuchhuah siamin, Lawngtlai District NEUM hnuaia member/staff zawng zawng ten State NEUM thuchhuak chu an zâwm dâwn tih an sawi a. Hun kal tawhah damlote ngaihtuahna avangin lungawilohna lantir an tum thin pawh an sût leh rih thin tih sawiin, tun tumah erawh chuan, an service dinhmun derthawng em em lak ata chhanchhuahna an chan ve theih nân hetiang hian hma an la tih an sawi a, an lungawi lohzia an auchhuahpuina kawngah damlo ten an lo tuar palh a nih pawhin mipui ten hrethiam turin an ngen bawk.
Ni 3 chhung mass casual leave laa nuar mek, National Health Mission Employees Union Mizoram (NEUM) chuan an nawrh tawp ni nimin thleng khan sorkara an thilphut chungchangah lungawina an la hmuh loh avangin tiamchin awm lova nawrh chhunzawm an tum.
Mass Casual Leave lak chungchangah hian Deputy Chief Minister Pu Tawnluia hovin niminpiah khan NEUM hruaitute chu an thukhawm a, he meeting minute nimina tih chhuahah NEUM ten an thilphut hrang hranga lungawina khawp an hmuh loh avangin nawrh zui an tum ta tih an sawi a ni.
Lawngtlai District-ah hian NHM hnuaia thawk hi mi 130-150 inkar vel an awm mek a ni.
Post a Comment