Rauthla, July 14, 2022 : Health Minister Dr. R. Lalthangliana'n kaihruaiin vawiin khan MINECO, SAD Conference Hall-ah Mizoram a COVID-19 hripui dinhmun thlirho a ni. He hunah hian Health & Family Welfare Board Vice-Chairman Dr ZR Thiamsanga, MLA, H&FW Principal Secretary Pi Esther Lalruatkimi, Health & Family Welfare, School Education, Higher & Technical Education, DIPR leh Finance Department hotute, Aizawl Bawrhsap leh ZMC hotute bakah Indian Medical Association, MKHC, CYMA, VC Asociation, NGHAM leh ACLCA aiawhte an tel a ni.
Vawiin thukhawm hian March ni 21 a in kaihhruaina (SOP) tihchhuah tuna kan hman mek chungchanga State Level Expert Team On Covid-19 Management (SLETOCOM) rawtna siamte an thlirho niin, mipuite tana phurrit lo leh eizawnna nghawng nasa lo thei ang bera inkaihhruaina siam a tul thu an sawi a ni. Hri kai inringhlelte tan a rang thei ang bera sample test a pawimawh thu sawi lan niin, natna langchhuak (symptom nei) te pawh an natna a lanchhuah veleh a rang thei ang bera in test thin turin an ngen a, mahni a sample in test (self test) te pawh IDSP hnenah emaw, anmahni bialtu health department hotute hnenah in report thin turin an ngen a ni.
Hrileng mek chu Omicron variant a nih tlangpui tawh avangin hri kai chhungte quarantine hranpa a tul lo tih sawiin, Hri kai tharte chu an natna a serious a nih loh chuan home isolation (mahni in lama inenkawl) uar a that thu sawi a ni a. CAB tha taka vawn a pawimawh a, contact tracing leh exit test a tul lo tih sawilan a ni bawk. Hri kai enkawl mekte chu uluk taka vil a an natna a zual deuh erawh chuan a rang thei ang bera damdawi in panpui emaw, in report emaw a tul thu sawi a ni. fimkhur taka mask leh kutkawr nen hri kaite enkawl a him tih sawi a ni bawk.
Sawrkar leh private damdawi in hrang hrangahte sample test theih a nih bakah awlsam taka pan theih turin kiosk leh mega kiosk siam thar leh a tul thu tarlan a ni a, sample test kit tun dinhmunah a thlaphanawm loh thu sawi a ni a, COVID-19 dona hmanraw chi hrang hrang pawh stock a awm that thu tarlan a ni.
Meeting chuan Zirna In hrang hrangah COVID-19 vaccination drive kalpui mek chu uar taka kalpui chhunzawm zel ura hmalak tha an ti a, tun dinhmunah chuan zirna in khar a tul rih loah an ngai a ni.
Post a Comment