Lawngtlai, July 29, 2022 : Nimina an chairman Lawngtlai Bawrhsap Pu Amol Srivastava hova DC Conference Hall-a Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) thukhawmnaah Pawisa thir chu sawrkarin hman theih tura a siam chhuah a nih thu leh tihtawp tumna a awm loh thu tar lan niin, dawn leh hman a hlauhawm lo va, dawng duh lo chu dan anga hrem theih zawk an nih thu tarlan a ni.
He ṭhut khawmah hian Lead Bank Office-a Lead District Manager (Siaha & Lawngtlai) Pu Lallawmkima leh NABARD Lungleia District Development Manager Pu Evan T. Munsong te bakah, Reserve Bank of India, bank hrang hrang leh line department ai awhte an tel a ni.
He hunah hian kum 2022 January thla aṭanga March thla (4th Quarter 2021-22) chhunga Lawngtlai District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho a ni a. Bank leh mipui sum vawn himna (security) lam te, pawisa leng vel (currency management & remittance) chungchang te, khua leh tuite hamṭhat nana sawrkar laipui ruahmanna hrang hrang - PMAY (Housing for All), Women Self Help Group, loan chi hrang hrang - Kisan Credit Card, KCC (AHDF special campaign), PMEGP, etc. leh social security scheme hrang hrang - PMJJBY, PMSBY, APY, etc. lama bank hma lak dan te sawi ho a ni bawk.He thut khawmah hian mi harsa zawkte leh kut hna thawktute hnena a tam thei ang ber sum puktir (loan pek) a, chumi hmanga an dinhmun chawi kan chu DCC-in a tum ber pakhat a nih thu tar lan niin, agriculture kaihhnawih loan pek chhuah a tam zawk theih nan line department leh bank lam te'n tan la chho zel se, tih a ni a. Loan chhia a awm loh nan sawrkar ruahmannaa loan pek chhuah a nih dawnin line department leh bank te'n a nihphung leh rulh dan tur te chiang taka inhrilhfiahna leh inzirtirna buatsaih hmasak thin ni se, tih a ni bawk.
Post a Comment