Lawngtlai, July 29, 2022 : Lai Autonomous District Council-a Deputy Chief Whip Pu H. Lalmuansanga chuan nimina Lawngtlai DC Conference Hall-a "Kawlphetha Kutpui" (Ujjwal Bharat - Ujjwal Bhavishya Power @2047) hmannaa khualian a nihnaah ‘Kawlphetha deh chhuah chu thil hautak tak a nih avangin renchem taka hman dan thiam a tul’ a ti.
Pu H. Lalmuansanga chuan chuan Khawvel hmasawnna leh changkannain kawlphetha mamawhna a tipung ve zel a, kawlphetha luh ngai lohna thingtlangah kawlphetha a luh hnuin kawlphetha hmang chi bungrua leh hmanrua a pung a, chu chuan a tha zawnga chhungkaw inelna leh khawtlang hmasawnna a thlen a ni a ti.
"Kawlphetha Kutpui" hi "India Eng - Hma lam Hun Eng" (Ujjwal Bharat - Ujjwal Bhavishya) tih thupui hmangin Ministry of Power ruahmanna anga buatsaih a ni a, India ram district 773-ah hman tura tih niin, Lawngtlai District-ah chuan District hmunpui Lawngtlai-ah leh RD Block thut hmun Bungtlang 'S'-ah te hman tura ruahman a ni a. He Kutpui hi kawlphetha siam chhuah leh sem darh kawnga kum 2047 thlenga hma lakna tur sawrkar hmathlir puan chhuah nana ruahman niin, Kutpui kharna (grand finale)-ah India Prime Minister chuan India hmathlir hi a tlangzarh dawn a ni.
Lawngtlai District huam chhungah pawh RAPDRP, Saubhagya, DDUGJY leh REDB scheme hmang te'n kawlphetha lamah hmasawnna hmuh chhoh zel a ni a. RAPDRP hnuaiah Lawngtlai khawpui huam chhungah 11kV line km 17-a thui, LT line km 23-a thui leh LT ABC km 4-a thui thlun tawh niin, DT (distribution transformer) 28 bun a ni a, consumer energy meter 2,775 vuahsak an ni a. Saubhagya scheme hnuaiah thingtlang khaw 88 tuamin, a thlawnin connection thar 5,496 thlunsak an ni a; 11kV line km 33.25-a thui leh LT line km 43.37-a thui te thlun tawh niin, DT 70 bun a ni a. DDUGJY hnuaiah 11kV line km 33.5-a thui leh LT line km 14-a thui te thlun niin, DT 10 bun a ni a, consumer energy meter 1,178 vuahsak an ni a. REDB hnuaiah Chawnhu Sub-Station aṭanga Lower Saikah inkar (km 10) leh Chawnhu Sub-Station aṭanga Bungtlang 'S' inkar (km 50.63) kawlphetha pekna tihchangtlun hna thawh a ni bawk.
Revamped Reforms based and result linked Distribution Sector Scheme (RDSS) hnuaiah Mizoram puma energy meter chu pre-paid smart meter-a thlak tur niin, tunah hian hna bul tan a ni tawh a. Lawngtlai khawpui chhungah pawh consumer meter thlak bakah hian, Chawnhu Sub-Station atanga Lawngtlai Sub-Station inkar 33kV Tower line siam leh Distribution Transformer 23 bun tura ruahman niin, DT awm sa 11 chu a aia tha zawka thlak tura ruahman a ni bawk.
Post a Comment