Lawngtlai, July 29, 2022 : Vawiin, July 29, 2022 khan Sanitation Committee, Council Veng te chuan Dustbin Use Campaign neiin, an veng chhunga dawrkai te hnenah a thlawnin bawlhhlawh bawm an pe.
He hun hi Sanitation Committee Chairman Pu Elvis Lalthangzuala'n kaihruaiin, veng chhunga dawrkai te chu Faina kawnga hmasawnna an neih zel theihna tur leh faina kawnga theihtawp chhuah a, anmahni dawrtu ten bawlhhlawh bawm chu tangkai taka hman a nih a, faina kawnga veng chhung mipuite hnenah theihtawp chhuahpui turin a sawm a. Dawr kai ten an mahni dawr bul hnaite chu vawng fai zel tur leh bawlhhlawh bawm chu a len leh tet lamah rilru pe lova, tangkai taka hmang turin a ngen bawk a ni.
He hun hman puitu District Project Officer, Lawngtlai (UD & PA) leh SDO (Sadar) ni bawk Pi TT. Beikhaizi chuan, Sanitation Committee te hmalakna a bawlhhlawh bawm sem hi thil ho tak angin kan ngai mai thei a, mahse a semtu rilru kan hriatpui a, faina leh thianghlimna kawnga hma kan sawn ngei ka beisei a ni, a ti a. Dawr neitute chu Faina leh Thianghlimna chungchanga campaigner tha tak an thu sawiin, an mahni dawrtute hnenah theihtawp chhuaha faina leh thianghlimna kawnga awareness lo nei thin turin a sawm bawk a ni.
Pi TT. Beikhaizi chuan, Faina leh Thianghlimna kawngah a committee ten theihtawp chhuah thin mahse, mipuite'n kan thawhpui si loh chuan awmzia a nei thei dawn lova. Chuvangin, faina kawnga hma kan sawn theihna tur chuan 'keimah hi ka pawimawh a ni' tih thinlung pu ila. Faina hian hriselna leh chhungkaw hlimna min thlen tih hria a, fai turin kan chhungkua atangin bul tan theuh tur leh bawlhhlawh bawm te tangkai taka hmang zel turin kalkhawmte a sawm a. Fai turin hausak kher a ngai lova, kan tih theih tawk lo tih a, bawlhhlawh a bawm a kan paih zel a, kan awmna leh a vel te vawng fai ila, chu chu thil tangkai tak a ni, a ti bawk.
Sanitation Committee, Council Veng ten an veng chhung dawrkaite hnena bawlhhlawh bawm an sem chhuah hi Lawngtlai District 'Swachhta Warrior' Pu Elvis Lalthangzuala'n faina lam hawia lawmman a dawng sum tlingkhawm atanga a lei a ni.
Post a Comment