Rauthla, July 07, 2022 : Mahatma Gandhi National Rural Employment Guarantee Act / MGNREGA hnuaia Ni 100 inhlawhna thila "Material Component kalpui danah corrupt practice (kalphung dik lo) nasa tak a awm a ni," ti a, Vigilance Cell, BJP Mizoram in Lokayukta a Complaint an thehluh chu ACB (Anti Corruption Bureau) chhui turin Lok Ayukta in 29/6/2022 khan order a chhuah.

Niminpiah khan Pi Lalremsangi Fanai BJP Vigilance Cell Vice Chairman, Pu K Laldinthara GS Vigilance leh Pu Johny Lalthanpuia Vigilance Member, State Media incharge te chuan ACB Directorate Office, MINECO-ah ACB Director leh Officer dang te hmuin, Ni 100 inhlawhna a thil fello awm chu rang taka chhui turin an ngen a, report an lo ngaihchan reng tur thu ACB hruaitu te hi an hrilh bawk.

BJP Mizoram chuan ACB hian Enquiry/chhui chianna hi an nei ang a, a tul leh dan angin Criminal case a kalpui dawn a ni, tiin tiin thuchhuah an siam a. Rural Development Secretary insawifiahna kha Lok Ayukta in thu tling ah angai lo a, Criminal Case rang taka siam a nih ngei kan ringin kan phut bawk an ti a. "ACB chhui tura Lok Ayukta-in Order a siam hi BJP Mizoram chuan lawmawm kan ti hle a ni," an ti.

BJP chuan, "Ni 100 inhlawhna a eirukna nasa leh langsar lutuk, tualchhung mipui rilru leh khawtlang inrelbawlna thleng ti chhetu a inhnamhnawih te chhui chhuak thuai turin kan phut tlat a. MGNREGS kalpui danah khawtina mipuiin an aiawh tura an thlan VC/LC te kuta thuneihna dah turin kan phut bawk a ni," an ti.

Lokayukta Chairperson Pu C. Lalsawta chuan hemi atana hriattirna hi June ni 29 khan a tichhuak a, BJP Mizoram Pradesh Central Schemes Monitoring & Vigilance Cell-in MGNREGS hnuaia Material Component kalpui danah Rural Development Department hotuten dan an bawhchhia nia an puhna chu Rural Development Secretary hnenah sawifiah tura tih a ni a, hei hi a chhanna dawn ni tawh mahse, Lokayukta chuan chhui zui ngai nia a hriat avangin Anti-Corruption Bureau chu Material Component kalpui dan chhui chianna, Preliminary Enquiry ti tur leh an chhuina report chu Lokayukta-a thehlut turin a hriattir a ni. 

Post a Comment

Powered by Blogger.