Lawngtlai, July 08, 2022 : Vawiin khan Central YLA Hall, Lawngtlai-III-ah zirlai naupangte tana faina leh thianghlimna chungchang leh chhiat rupna, vaihlo leh a kaihhnawih leh HIV/AIDS laka himna chungchang inzirtirna neih a ni. "Sensitisation programme on Swachh Bharat Mission (Urban), Familiarisation Exercises under DM&R, Anti-Tobacco & HIV/AIDS" programme hi Lawngtlai District Deputy Commissioner, Urban Development & Poverty Alleviation (UD&PA) Department, National Tobacco Control Programme (NTCP) leh Mizoram State AIDS Control Society (MSACS) te tang ho huaihawt a ni.
Swachh Bharat Mission (Urban) hnuaia Lawngtlai khawpui faina leh thianghlimna kawnga hma sawn tura inzirtirnaah UD&PA Lawngtlaia District Manager Pi VL Ramnunsangi leh Pi Kerry VL Hmangaihzuali te chu resource person niin, faina chu mi dang kuta dah lo va, mi tinin mawhphurhnaa lak a pawimawh thu te, sawrkar laipuiin hman khat daih sarang (single use plastic) hman a khap chu a taka hma lak tan a nih dawn thu te tar lan a ni a. Swachhta Warrior Pu Elvis Lalthangzuala kaihhruaiin zirlai naupangte chu faina kawnga hma la turin an intiam nghal bawk.
DM&R Lawngtlai hnuaia Quick Response Team Leader Pu HC Lalnunchama chuan zirlai naupangte chu chhiat rupna lo thlen thulha chhanchhuahna hna thawh dan tur a taka entirin a zirtir a. MSACS hnuaia Integrated Counselling & Testing Centre, Lawngtlaia Counsellor Pu CZ Rodingliana chuan HIV/AIDS chungchang leh he natna laka himna tura thil pawimawh hrang hrang zirtirna hun a hmang bawk.
He hunah hian Lawngtlai Bawrhsap Pu Amol Srivastava chu Khuallian niin, zirlaite chu ram hma hun innghahna an nih angin khua leh tui tha ni tura an hmaa mawhphurhnate hlen theuh turin a chah a ni.
He hunah hian Lawngtlai khawpui chhunga sikul paruk - Ngurnunsangi English School, Don Bosco School, Jehova Jireh Higher Secondary School, Downtown English School, Vista Higher Secondary School leh Harvard Higher Secondary School atangin zirlai naupang thahnem tak an kal khawm.
Post a Comment