Lawngtlai, July 08, 2022 : Town Committee, LADC chuan Lawngtlai khawpui chhung a lo felfaia a thianghlim zel theih nan hma an la mek a. Lawngtlai khawpui chhunga hrui inzawmhnawk lutuk thenfai tumin tunah hian hma an la mek.
April 25, 2022 khan Pu Sanghuliana Mualchin, Town Committee Chairman, LADC chuan Lawngtlai khawpui chhunga Service Provider-te, BSNL, Jio, Airtel te, Cable TV neitute leh Electric Department te, kokhawmin, Cable TV, Internet Connection leh Telephone, Electric hrui inzam dan chungchangah mumal zawka hmalak tan dan tur an sawiho tawh a, he an thurel ang hian hmalak chhunzawm a ni a, tunah hian Lawngtlai Bazar veng chhung thenfai mek a ni.
Bazar venga hnathawh chin hi a muang hle nia hriat a ni a, hemi chungchangah hian Rauthla chuan Pu Sanghuliana Mualchin, Town Committee, LADC biain, Pu Sanghuliana Mualchin chuan, 'Lawngtlaia hruihnawk lutuk thenfai hna hi meeting-in a rel angin Bazar Veng atanga thawh tan tur a ni a, mahse, hna a chak lo hle tih hriat a ni. Hemi chungchangah hian inhmuhkhawm koh vat tum a ni a, a tul angin hmalak zel a ni ang' a ti a. Hruizam thar tur chuan an hmalakna hrerengin hma lo la tawh thin turin Service provider-te chu a ngen nghal bawk.
Ruahman dan chuan Lawngtlaia hrui hnawk lutuk thenfai hna hi Bazar veng a zawh hunah hian Lawngtlai - III leh Chandmary ah thawh chhunzawm a ni ang.
Post a Comment