Lawngtlai, July 22, 2022 : Lawngtlai District Football Association chuan Mizoram State Sports Council-in District Sports Committee kalphung thar a siam leh Mizoram chhunga infiammite inkaihhruaina leh inrelbawlna dan a siam, The Mizoram State Sports Council, Act 2022 leh The Mizoram State Policy, 2019 a siam, Mizoram Gazette-a chhuah chu lawmawm an tih thu an sawi.
Hemi chungchangah hian LDFA chuan vawiin khan thuchhuah siamin 'Mizoram sorkar chuan tunah hian Sports Policy fel tak neiin, Sports chu Industry pakhatah puang tawhin, infiamna huang hrang hrangah pawh hmasawnna min thlen ngei pawh kan beisei tak zet a ni' an ti a. Mizoram State Sports Council-in hemi chungchanga Gazette-a a chhuah chu an thlawp tih an sawi.
Hetih lai hian July 20, 2022 a SYS Office, LADC a Lawngtlai District chhunga Sports Association hrang hrang hruaitute kalkhawm chuan Mizoram State Sports Council-in District Sports Committee kalphung thar a siam chu tha an tih loh thu leh dan hman lai anga kal nise tiin an rel. Meeting-ah hian Lawngtlai DFA pawh telin, meeting thutlukna hi an pawm lo.
Post a Comment