Rauthla, July 22, 2022 : CADC Sorkar-a sum hman dik loh thubuaiah kum 2013-14 chhoa CEM, tuna Tuichawng bialtu MLA nilai Dr. BD Chakma leh CADC a CEM nilai Pu Budha Lila Chakma te tiamin mi 13 te Special Court in thiam loh a chantir an ni.
Vawiina Prevention of Corruption Act Special Court Judge Pu Vanlalenmawia'n Court thutlukna a tihchhuah-a tarlan a nih danin, heng thiam loh chantir tak mi 13 te hian kum 2013-14 chho khan Sorkar laipui atanga hmasawnna hnathawhna tur sum lo kal, Development Fund cheng vbch. 1 leh nuai 37 chuang chu hlawh atan an lo insem a, thubuai chhui laiin rul leh vek tawh mahse, Dan kalha an chet avangin thiam loh chantir an ni. Thiam loh chantir midang 11 te hi Amar Smriti Chakma; Adikanta Tongchangya; Parimal Chakma; Susen Chakma; Taranisen Chakma; Sushil Kumar Chakma; Chitra Kumar Chakma; Ajoy Kumar Chakma; Buban Kumar Chakma; Mohan Chakma; Amit Kumar Chakma te an ni a, an vai hian kum 2013 atanga 2018 chhunga Chakma Autonomous District Council-a Member vek an ni a.
Court thuremna puan a nih hnua eiru-a puh an nihnaa thiam loh chantir an nih chungchangah Tuichawng bialtu MLA, Dr. BD Chakma chuan, Advance Salary atana Development Fund sum an hman hi an laka FIR thehluh a nih hmain a lo rul fel vek tawh tih a sawi a, hetiang a ni chunga thiam loh chantir a ni chu hremna thuah hnih nia a ngaih thu a sawi a, Court sang zawka khinlet a tum tih a sawi.
Post a Comment