Lawngtlai, July 15, 2022 : Vawk pul hri ASF hri leng chuan Lawngtlai District tuam chho mekin, Lawngtlai khawpui chhungah pawh ASF vanga vawk thi leh damlo a awm nual a. Tun hnaia Lawngtlai College Venga vawk thi chu Rapid Antigen Test hmangin ASF vei a ni tih finfiah a ni. Piggery Society hruaitute sawi danin Lawngtlai College Vengah hian vawk 26 thi tawhin, vawk damlo a la awm nual bawk a ni. 

Lawngtlai Bawrhsap Pu Amol Srivastava hovin vawiin khan Lawngtlai District chhunga vawk natna hri leng, African Swine Fever (ASF) chungchang ngaihtuahin State sawrkar leh Lai Autonomous District Council (LADC)-a Animal Husbandry & Veterinary (AH&Vety) hotute, sawrkar official pawimawh dangte, Piggery Society hruaitute leh chanchinbu mite an thukhawm a. Lawngtlai Bawrhsap Pu Amol Srivastava chuan vawk natna hri leng chu theih tawp chhuaha ṭang tlanga do let ngai a nih thu sawiin, vawk vulhtute chauh an fimkhur hian awmzia a nei thui thei tawh lo va, hri pu darh theitu zingah mihring kan tel avangin mi tin kan fimkhur a ngai a ni, a ti.

Official-te'n an sawi danin, tun dinhmunah sawrkar hriatpuinaa vawk tihhlum 150 awm tawhin, Pangkhuaah 143, Sangauah 2 leh Cheuralah 5 ah te vawk tihhlum an ni. ASF tih finfiah chiah loh leh sawrkar hriatpui lohva thi report Pangkhuaah 19, Sangauah 30, Vawmbukah 9 leh Cheuralah 2 a awm tawh bawk.

Vawiin meeting-ah hian Lawngtlai khawpui chhung leh District chhung hmun dangah ASF a darh zel loh nan hma lakna tur hrang hrang a ruahman a ni a. Khawpui chhung bikah ran talh phalna nei lo chuan talh lo se, talh phalna neite pawhin AH&Vety mi thiamte'n an ran talh tur talh tlak a ni tih an finfiah chauh talh se, ran talhna hmunte endik ṭhin ni se, tih a ni a. Mipui lamah uar leh zau zawkin fimkhurna tur, tih tur leh tih loh tur te puanzar ni se tih a nih bakah, Lawngtlai khawpui chhungah vawk suat a ṭul thulha a phumna tur hmun ruahman sa, KMMTTP kawngpui kama mi chu en zui ni se, tih a ni bawk.

Post a Comment

Powered by Blogger.