Lawngtlai, July 27, 2022 : Vawiin khan LADC Chairman Pu VL. Hmuaka kaihhruaina hnuaia LADC Fur thutkhawm neih a ni.
Vawiin LADC Fur thutkhawmah hian session hnuhnung ber atanga tun session inkara MDC lo ni tawh boralte; Pu F. Hranglura leh sunna hun hman a ni. Pu F. Hranglura hi Sept. 1, 1956 khan Lungtianah a piang. January 1988 ah Congress Ticket-in Lungtian bial atangin MDC atan thlan tlin a ni a, EM nihna a chelh. Kum 1992 ah Independent-in Lungtian bialah thlan tlin a ni leh a, kum 2010 ah Congress ticket-in Lungtian bialah thlan tlin a ni leh bawk a, EM hna a chelh. April 22, 2022 khan ropuina ramah a chawl.
Pu V. Lungmuana hi February 2, 1942 ah Tuipang V ah a piang a. kum 1988 ah Chandmary bial atangin MDC ah thlan tlin a ni a, EM nihna a chelh. A thih ni thlengin MNF Dist. Hqrs; Lawngtlai Adviser nihna a chelh a, A that laiin Lawngtlai District People Conference Party ah leh Lai District Congress Committee-ah President nihna te pawh a lo chelh tawh a ni. July 8, 2022 khan ropuina ramah a chawl ta a ni.
South Lungpher bialtu Pu C. Lalmuanthanga zawhna chhangin EF&CC department changtu leh CEM ni bawk Pu V. Zirsanga chuan April 1, 2021 atanga kumin April 1, 2022 thlengin Balu, GSB, Thingzai leh Mau atangin royalty cheng 110,65,315 a luh thu a sawi a. Mau atangin royalty a lut lo a ti. Pu C. Lalmuanthanga zawhna dang chhangin CEM Pu V. Zirsanga chuan kum 2022-2023 LADC budget pass taka post ruak hnanghet lak tura ruahmannaah hnanghet 5 lak a nih thu leh tun financial year (2022-2023) chhungin MR 353 lak a nih thu a sawi.
Chandmary bialtu MDC Dr. Lorrain Lalpekliana Chinzah zawhna chhangin Sports & Youth Services Department EM Pu C. Hrangthianga chuan LADC huam chhungah Sports Academy pahnih, Football leh Boxing Academy din a nih thu a sawi a. SYS Football Academy 2nd Batch hawn belh a nih thu leh tun dinhmunah Sports Academy hawn belh tumna a awm rih lo a ti. Dr. Lorrain Lalpekliana Chinzah zawhna dang chhangin Revenue Department changtu EM Pu C. Hrangthianga chuan mi 52 hnenah Non Mizo Tribal Licence pek a ni a ti a. Mi 5 hnenah dealer licence pek an ni a, a bak zawng hi temporary licence pek an ni a ti. Dealer licence ah hian kum hnih tan Rs. 3000 lak a ni a, temporary licence hi kum khat atan Rs. 1000 lak a ni a ti bawk.
Pu C. Lalmuanthanga chuan 'The Lai Autonomous District Council, Trading Regulation Rules, 2004' ah chuan Non Mizo te hnenah temporary licence chauh pek tur a ni tih a nih laiin leh temporary licence pekte pawh hian Inner Line Permit kum hnih valid a nei tur tih a ni bawk a, hetih lai hian hnam dang mi 5 hnenah dealer licence pek a ni a, he rules hi kan la hmang reng em? nge kan hlamchhiah zawk tiin zawhna a siam a. Pu C. Hrangthianga chuan he rule hi kan la hmang renga ti a, kan hma hun tam tak kaltaaa licence an lo pek tawh dan a ni a, Inner Line Permit chungchang hi dan ang takin an hman theih loh avangin an niina an lo kalpui tawh, keini ina khawng taka kan kalpui chuan helaiah hnam dang sumdawngte kan mamawhna a sang si a, keimahni Laite hian sumdawnna hlawk zawkin kalpui se tih hi kan duh ber a ni a, chutiang ang chu awm sela vai ho hi dealer licence kan pe lo vek vek ngam a ti a, kan ramah kan mamawh ang min phuhru thei kan mi leh saah kan la neih tlat loh avangin hnam dangte kan la mamawhna chin a awm tlat a ni a ti a. Dan kalh deuh hlek a ni chungin kan hotute lo kalpui tawh thin dan kha keini pawhin kan zawm ve mai a ngai a, dan kan lo palzut deuh a, hetiang hian licence pawh kan lo pe chhuak thin a ni a ti. Vai mi 5 te hnenah Dealer Licence pek te hi he dan siam hmaa pek an ni tih Pu C. Hrangthianga chuan a sawi a, tuna kan dan hman lai hian a huam ve lo tiin a ngaih theih a ni a ti.
Vawiin sesssion-ah hian Unstarred questions pahnih leh Starred question pali chhan a ni a, LADC Monsoon Session hi naktuk dar 10:30am ah LADC Session Hall-ah chhunzawm leh a ni ang.
Post a Comment