Lawngtlai, July 27, 2022 : Central Young Lai Association chuan District Hospital Lawngtlaiah Gynaecologist a awm theih nan hma an lak chhunzawm zel tur thu sawiin, District Hospital Lawngtlaiah Gynaecologist dah turin sorkar an ngen nawn a, he an hmalakna hi August 10, 2022 thleng an ngaichang dawn tih vawiin khan thuchhuah siamin an sawi.
Central YLA hian May 25-28, 2022 chhung khan District Hospital Lawngtlaia thawktu indailohna avanga sorkar nawr nan Picketing an lo nei tawh a, hemi avang hian May 26&27, 2022 khan District Hospital Lawngtlaiah Doctor Specialist - Gynaecologist, Pediatrician leh ENT te dah an ni. Specialist dang zawng hian an hna an zawm a, Gynaecology doctor hian tun thlengin a hna a la zawm lo.
Central YLA chuan chuan Lawngtlaiin DHL a thawktu indaihlohna avanga piketing an neih hnu, thla hnih ral hnuah pawh kan mamawh ber Gynaecologist kan nei lo an ti a. Hemi avang hian Lawngtlai District chuan harsatna tam tak a tawk mek a, fur khaw chhia leh kawng chhe karah hmun hla tak pan ngaiin kan awm a, damlo na leh harsa zawkte tan phei chuan a manganthlakin sum leh pai tam tak kan insen phah thin a ni an ti. CYLA chuan picketing an neih laia a tawp thlenga theihtawp an chhuah tur thu an sawi angin Lawngtlaia Gynaecology doctor a awm theih nan hma an la a ni tih an sawi.
CYLA chuan sorkara an ngenna hi tihhlawhtlin a nih loh chuan August 11, 2022 atangin an thiam dan ang angin hma an la dawn tih an sawi a, India Independence Day Programme pawh boycott an tum thu an sawi.
Post a Comment