Rauthla, June 20, 2022 : ZPM Thalai chuan vai/non tribal-te Mizoramah contractor an nih theihna dan siamtu congress party leh chu dan hmanga vai/non tribal contractor atana ruattu MNF party-ten Mizoram leh hnam tâna pawi an khawih chu a inchen chiah a ni an ti.

ZPM Thalai chuan vawiin khan thuchhuah siamin, congress sawrkârin Mizoramah tribal ni lo ten contractor an nih theihna dan chu siamin, November 13, 2014 khan sawrkâr gazette-ah an chhuah a, he dân tlawhchhan hian, MNF sawrkâr hnuaia contract hna tam tak lo thawktu Kamrul Islam Lasker (Kamlova Chhangte inti) chu MNF sawrkârin class I contractor atân a ruat tih an sawi a. Ram leh hnam hmangaihna kawngah MNF leh Congress hian tih tak takna an neih lohzia leh an hlawkna turah chuan mahni hnam hralh mai pawh pawi an tih lohzia a lang chiang hle a, Congress leh MNF party-te hi mipui ten an dem takzet a ni an ti.

A hna chhiat ziain Zoram pum a thanchhuah hnuah leh a hna chhiat avanga Lengpui Airport chim chungchang pawh Zoram titi a nih laia Kamrula class I contractor-a kaisan tir a ni leh chu ZPM Thalai chuan hriatthiam har an ti a, a phenah hlawkna teltu mi tu emaw a awm an rin thu an sawi bawk.

ZPM Thalai chuan Mizo hnam party inti MNF chu Mizoram sawrkâr awm tawh zinga first class contractor atâna vai ruat hmasabertu an ni tih hi Mizoram history-ah a dai leh tawh ngai lovang an ti bawk.

Post a Comment

Powered by Blogger.