Siaha, June 11, 2022 : Chhimtuipui group YMA te chuan kan hmalawk a YMA Day vawi 78-na lo thleng tur denchhen a ruahmanna an siam angin vawiin khan PHE Department Siaha te nen Siaha khawpui tui lakna Beita lui hnar, Tlapi-ah thingphun beihpui an thlak.
Hnatlang vailiamtu Pu HC. Biakcheuva, EM i/c Forest MADC chuan YMA ten kan tui hna tipung tur leh environment siam that nana hma an la chu lawmawm a tih thu sawiin, 'Mizoram khawpui zinga tui harsatna ni thin Siaha chu kan tan rualna zarah tuiah kan hnianghnar chho leh ta hret hret a,a lawmawm tak zet a ni, tha i thlah lovang u' a ti a. Vawiin a kan hna thawh result hi naktuk a lang nghal mai chi a ni lo,nakinah kan tu leh fate tan zel a ni tih i hria ang u, a ti bawk.
Vawiin hnatlangah hian thingtiak 62 phun a ni a, nikum lama MNREGA hmalakna a thingphun bul engemaw zat an sam fai a, a nunglo te thingtiak dangin an thlak bawk.Vawiin hnatlangah hian Siaha khawpui chhunga YMA Branch hrang hrang atangin member engemaw zat an thawk chhuak a ni.
Post a Comment