Shillong, June 11, 2022 : Vawiin khan Pu V. Zirsânga, Chief Executive Member (CEM) Lai Autonomous District Council (LADC) chuan Lapalang, Shillong hmuna Lai Hostel a hawng.
Hawnna programme hi Community Hall, Lapalang-ah neih niin, Pu V. Zirsanga chuan zirlaite chu thahnem ngai taka lehkha zir tur leh hnam hmel timawitu leh tihmingthatu ni ngei turin a chah a, Pawisa neilo chung pawh a, rualawhna avanga hostel hi din a nih thu sawiin, 'he hostel hian rah duhawm a tak chhuah se, kan ram leh hnam tana inpekna thar nen, thahnemngai takin lehkha kan zir a, ei zawnna tlak thiamna kan neih a ngai a ni' a ti a, hmasawn zel turin zirlaite chu a beisei tlat tih a sawi bawk.
Lai fa zirna sang zawk leh thiamna duha Shillong-a an awm chhung a, harsatna an tawhlohna tura Hostel peihfel a ni ta chu lawmawm a tih thu leh, LADC sawrkar chuan zirlai chauh nilovin, hna zawng mekte tan dan dik tak leh kalphung fel tak nei a, exam leh interview paltlang a, a tlingte chauh lak an ni tawh dawn tih Pu V, Zirsanga chuan a sawi bawk.
Chief Executive Member, Lai Autonomous District Council (LADC) Pu V.Zirsanga hi Pu Andrew Laltlanzara, EM (Edu-MS) leh Pu L. Daniala EM (Edu-PS) ten an tawiawm a, an ni pahnih pawhin zirlai kalkhawmte hmaah zirlaite fuihna thu tha tak tak sawina an nei bawk a ni.
Shillong-a Lai Students Hostel hawn takah hian zirlai 35 awm theihna tura ruahman niin, Superintendent in a awmchilh dawn bawk a ni. Hostel ah hian Dining Hall, LSA Office leh Garage buatsaih a ni a, Advisory Board din niin, Hostel luh theih hun tur leh tul leh pawimawh te tihchhuah a ni ang.
Shillong-a Lai Hostel thar tur hawnna hun hi LSA General Headquarters President Vanlalruatpuia Fambawl leh General Secretary MC Vanllarova ten hmanpuiin, Lapalang VCP Dorbar Shnong leh Lai Christian Fellowship, Shillong hruaituten an telpui bawk a ni.
Post a Comment