Lawngtlai, June 17, 2022 : Lai Students' Association General Headquarters chuan MBSE in kum 2022 HSLC leh HSSLC result a tihchhuah taka Laifa zirlai Distinction leh Mizoram puma top ten a lang pha te chawimawina hun a buatsaih.
Vawiina Central YLA Hall, Lawngtlai-III a he hun hmannaah hian Pu C. Rongura, EM LAD, LADC chu khuallian a ni. Chawhma lam hun Tumbikceu, Vice President kaihhruaiah hian Pu F. Chanliana Sr. Adviser chuan hunserh hmangin, Mc Vanlalrova hnen atangin report ngaihthlak a ni.
Khuallian Pu C. Rongura chuan zirlaite chu kan tam leh hnam nghahfak an nih thu sawiin, 'vawiina Zirlaite hi naktuk maia kan ram hruaitu turte leh kan hnam chhan nana ke pen turte in ni a, theihtawp chhuaha nihna sang tak nei turin ka chah che u' a ti.
Khuallian chuan, awlsam leh nuamsa taka zir thinte zingah hlawhtling an tlem thu sawi bawkin, tumruhna leh tuarchhelna nen zir tura fuihin, zirlaibu leh lehkhabu te a tam thei ang ber chhiar thin tura chahin, 'chhiar tam chu hriatna leh finna a ni a, a tam thei ang ber lehkhabu chhiar thin rawh u' a ti bawk.
F. Vanlalruatpuia, President LSA Gen. Hqrs; Lawngtlai chuan State leh Central services ah Laifate a tam thei ang ber an luh theih nan LSA chuan theihtawp a chhuah mek tih sawiin, chumi kawngah chuan Zirlaite chuan an tih tur ti se, LSA pawhin Zirlaite tan a tih tur a ti ve zel dawn tih sawiin, zirlaite chu 'in Zirna kawngah harsatna in nei a nih chuan a theih chinah LSA chuan theihtawp a chhuah pui zel dawn che u a ni' a ti. F. Vanlalruatpuia chuan zirna lamah Lawngtlai Dist. chu a hniam ber pawl a nih thu sawiin, quality education nei turin Zirlai kalkhawmte chu a fuih a. Zirna thalo chuan ram leh hnam, khawtlang a ti chhe thei a, a ti chhe mek bawk a ni a ti.
LSA General Headquarters buatsaih Zirlai ti thate chawimawina hun chawhnu hun hi K. Lalenmawii chuan kaihhruaiin, Resource person a ruat ten Zirlai kalkhawmte hnenah career guidance neihpuiin hun hman a ni.
Zirlai ti thate chawimawina hun buatsaihah hian HSLC ah Zirlai 48 leh HSSLC ah Zirlai 24 chawimawina hlan an ni a, heng zingah hian HSLC- a Top-6 leh HSSLC-a Hindi subject a topper te an tel a ni.
Post a Comment