Chawngte ah ni 3 awh tur pawl 5 aṭanga pawl 12 inkar zirtirtute tan capacity development training neih a ni

Chawngte, June 17, 2022 : Lawngtlai District Administration hma laknaa Lawngtlai District chhunga zirna tihhmasawn nana Pratham Foundation nen ṭang duna pawl nga aṭanga pawl sawmpahnih inkar zirtirtute tana capacity development training ruahman chu a thawh khat nan Chawngte RD Block huam chhungah kalpui ṭan a ni.

Ni thum awh tur he Gurushala Teachers' Training hi Chakma Autonomous District Council (CADC)-a Education Department huaihawtin Kamalanagar Public School-ah nimin khan ṭan a ni a. Training hawnna inkhawm buatsaihah CADC-a Chief Executive Member Pu Buddha Lila Chakma chu khuallian niin, Chawngte Sub-Divisional Officer (Civil) Dr Manesia Khaimeichho chu khual zahawm a ni a. CADC-a Education Officer (P/S leh M/S) te pawhin an telpui a ni.

Training-ah hian Master Trainer 8 te'n an zirtir dawn a. Kamalanagar (Chawngte) khawpui chhunga sikul hrang hrang - Govt Comprehensive Middle School, Kamalanagar Public School, RCM Comprehensive Middle School leh KMM Comprehensive Middle School aṭangin zirtirtu 67-in he training hi an chhim a ni.

Gurushala Teachers' Training hi Lawngtlai District chhung RD Block tinah kalpui tura ruahman a ni a. Block dangah pawh inbuatsaihna kalpui mek a ni.