Lawngtlai, June 24, 2022 : International Day Against Drugs Abuse & Illicit Trafficking pualin vawiin khan Government Region Higher Secondary School, Lawngtlai Hall-ah SP Office, Lawngtlai huaihawtin hun hman a ni a, he hun hi Lawngtlai SP Pu Rakhesh Paweriya chuan a hmanpui. International Day Against Drugs Abuse & Illicit Trafficking hi June 26 a ni a, hemi ni hi Pathianni a nih vangin remchan zawkna vangin vawiin khan hman a ni.
Lawngtlai SP Pu Rakhesh Paweriya chuan 'ruihhlo vawikhat tihchhin hian damchhung nunah nghawng tha lo a nei thei a, hei vang hian ruihhlo la tilo ten tihchhin chakna in neih pawhin, in hmalam hun atan thilthalo a thlen dawn avangin in hnawl ngam tur a ni' a ti a, Vaihlozial zuk chu sual tihtanna bul a ni a, inven nasat a ngai zual a ni a ti a. Zirlaite chu ruihhlo laka fihlim turin a chah a ni.
He hun ah hian Lawngtlai Additional SP Pu C. Lalruatkima'n zirlai kalkhawmte chu ruihhlo tih a thatloh dante, taksaa tihchhiat dante a lem nen entirin a zirtir a, ruihhlo in chhiatna a thlen dan zirlai atangin Lemchan tawi entir a nih bakah Gelead Drop-in-Centre, Lawngtlai atangin HIV/AIDS chungchang inzirtirna neih a ni bawk.
Vawiin hun hmannaah hian Lawngtlai SP Office-in International Day Against Drugs Abuse & Illicit Trafficking puala Drawing Competition an buatsaih lawmman semna neih a ni a. Downtown English School-a Class X zirlai Lalfakzuala chu pakhatna niin, Downtown English School-a Class IX zirlai Esther Hmingthianghlimi chu pahnihna niin, Lairam High School-a Class X zirlai Vasty Zothantluangi chu pathumna a ni. Mi 10 hnenah Consolation prize pek a ni bawk. He hunah hian kalkhawmte hian Ruihhlo leh Vaihlo tilo tura intiamna sawi rualna an nei nghal a ni.
Damdawi ruih theih chi leh dan phalloh hmanga sumdawnna tilo tura inzirtirna hun buatsaih ah hian Lawngtlai khawpui chhunga Sikul Sawm atangin Zirlai 400 leh Zirtirtute, VC Association, LSA Gen. Hqrs., LWA, MHIP leh YLA hruaitute an tel a ni.
Vawiin vek khan Lawngtlai Police te chuan No.4 gram 102.23 chu Liquid Treatment Method hmangin District Hospital, Lawngtlaiah Effluent Treatment Plant(ETP) ah an tiral nghal a ni.
Post a Comment