Rauthla, May 19, 2022 : Tunlai ruahsur nasain rel kawng a tihchhiat nasat avangin a siamṭhat chhung a rei dawn a, motor kawng erawh reilote ah siamṭhat hman beisei a ni. Hetih lai hian mipui hnena ration pek chhuah kawngah harsatna a awm dawn lova, rel kawng siamṭhat a nih hma chu motor-in Mizoramah buhfai phurh luh a ni ang.

Vawiin khan Supply Minister K. Lalrinliana hova, Supply department hotute, Food Corporation of India te leh India Oil Corporstion Ltd. te thukhawm chuan tunlai ruahsur nasa avanga rel kawng leh motor kawng a tihchhiat avanga Buhfai, POL (Petroleum, Oils & Lubricants) leh chakkhai mamawh zual Mizorama lakluh a khaihlak dan leh mipui ten an tawrh loh nana hmalak dan tur an sawiho.

Supply Department leh FCI te buhfai stock (chhekkhawl) report enhona atanga a lan danin, mipui hnena ration buhfai pek chhuah kawngah harsatna a awm rih dawn lo tih sawi chian a ni.

IOCL lam chuan HSD (Diesel) chu Ramnagar Oil Depot ah a tam thu an sawi a, Mizorama lakluh kawngah harsatna a awm loh thu an sawi bawk a ni. MS (Petrol) hi Ramnagar Oil Depot ah a tlem avangin Guwahati atanga la turin Oil Tanker 30 Silcharah an awm tawh thu an sawi bawk. Borkhola Gas Bottling Plant atanga thu dawn danin Gas (LPG) supply ah harsatna an neih rih lo thu hriat a ni bawk.

Rel kawng hi a rang thei ang bera siam that a nih theih nan Supply Minister chuan Union Railway Minister hnenah thlenin a siamthatu turte tun aia tam zawk dah turin a ngen a, heng bakah hian External Affairs Minister hnenah Bangladesh kaltlanga POL leh Gas (LPG) lak luh a nih theih nan a rang lama hma laksak tur in a thlen bawk a ni.

Post a Comment

Powered by Blogger.