Rauthla, May 20, 2022 : Kum 13 zet ram atan a khelh hnuah Gabonese striker Pierre Emerick Aubameyang chuan ram tan inkhelh a chawlhsan thu a puang.
Barcelona striker Aubameyang chuan kum 13 chhung zet ram tana ka inkhel thei chu ka inchhuang hle a, tunah chuan ka chawlh a hun ve tawh a ni a ti a. Engtik lai pawha min support-tu Gabonese mipuite chungah lawmthu ka sawi a ni a ti bawk.
African Footballer of the Year hlui, kum 32 mi Aubameyang hi June 18, 1989 khan Laval, France-ah a piang a, a naupan lai chuan ASL L'Husserie, Nive, Laval, Bastia-ah te a khel a. Kum 2007 khan AC Milan Youth Academy a zawm a, kum 2011 thleng khan Dijon, Lille leh Monaco-ah te loan-in a kal a, AC Milan tan hian a inlan hman lo.
Kum 2011 khan Saint-Etienne lamah a nghetin a kal a, he club tan hian game 87 khelin goal 37 a thun. Kum 2013 khan khawvelin an hriat tanna Borussia Dortmund lamah a kal a, he club tan hian game 144 khelin, goal 98 a khung a, kum 2018-2022 chhung khan Arsenal-ah khelin game 128 ah goal 68 a khung a bawk. June 2022 khan Barcelona a zawm a, game 16 khel tawhin goal 11 a thun mek a ni.
Dijon tan a khelh that em avangin Italy U-19 zawm tura sawm a ni a, mahse France U-21 tan khelh a thlang zawk a. Aubameyang hi Spain tan pawh a khel thei a, mahse a pa khelhna Gabon tan khelh a thlang zawk bawk. Gabon tan hian Game 72 khelin, goal 30 a khung a ni.
Post a Comment