Vaseikai, May 9, 2022 : Nimin May 8, 2022 khan MZP nia inchhal ten Vaseikai, Lawngtlai District-a vai dawrkaite hnenah pawisa an khawn a, Rs. 60,000 vel an khawn chhuak.
Pu Arjun Tong-changya, President, YLA Vaseikai Branch sawi danin, MZP intite hian inrinni, May 7, 2022 khan an inah an len thu a sawi a, Vaseikaiah Donation khawn an tum thu an sawi niin a sawi a. Pu Arjuna-a chuan kumin atangin CYLA in Vaseikaiah eng pawl mahin donation khawn an phal loh thu leh he thu hi an branch pawhin an kenkawh tlat thu a lo hrilh a ni.
Hetiang a nih mek lai hian MZP nia inchhalte hian nimin khan Vaseikaiah hian donation hi vai dawr 7 atangin Rs. 60,000 an khawn chhuak a, vai pahnih kut an thlak a, a then an vau bawk.
YLA President Pu Arjun Tongchangya-a sawi danin niminpiaha a ina leng pakhat chuan MZP Aizawla Treasurer a nih thu a sawi bawk a. MZP hian kum dangah pawh Vaseikaiah hian donation an khawn thin thu a sawi bawk.
Vaseikai Police ten MZP nia inchhalte hi Chawngte lamah an um a, Chawngte leh Vaseikai inkar an inhmu a, man tuma an beih laiin MZP nia inchhalte hian 'SP Leh SDPO chin an ngai ang' tiin an sawi a. Hemi hnu hian man lovin an inlehpel a, Chawngteah Chawngte Police-in man lehin, lock-up ah dah an tum a, hei hi duh lovin he thu buatsaih lai hian Lunglei lam an pan leh mek nia thu dawn a ni.
Vaseikai leh Chawngte inkara an inhmuh hian MZP nia inchhalte pakhat chuan MZP Vice President a nih thu a sawi bawk.
Post a Comment