Kamalanagar, May 9, 2022 : Vawiin, May 9, 2022 khan Chakma Autonomous District Council-a Chief Executive Member Pu Rasik Mohan Chakma chu No confidence motion hmanga paihthlak a ni.
Vawiin khan CADC Session hi Kamalanagar-ah neih a ni a, he session-ah hian CEM laka lungawi lo MNF MDC mi 14 ten CEM an rintawklohna motion chu House-ah an pulut a, motion hi Pu Kali Kumar Tongchangya-an a move a ni. Motion hi vote hmanga tihtluk a ni a, motion thlawp zawng lamah member 13 in ban an an phar.
Tarlan tawh angin CADC a MNF MDC 14 te chuan niminpiah khan CEM Pu Rasik Mohan Chakma chu hleihnei taka rorelah puhin CEM a nihna atanaa bang turin lehkha an pe a, a bang lo a nih chuan session-a an move thlak tur thu an sawi bawk.
CEM paihthlatu MDC 14 te hian vawiin khan MNF Legislature Party Leader atan Pu Buddha Lila Chakma an thlang a, Pu Buddha Lila Chakma hi hun remchangah CADC CEM atan lakluh a ni.
Pu Buddha Lila Chakma hi CADC MDC ah tum 4 thlan tlin a ni tawh a, CADC sorkarah CEM, Chairman leh EM hna te a lo chelh tawh a. January 14, 2019 khan chairman a nihna atangin no confidence motion hmanga paihthlak a lo ni tawh bawk.
CADC term hi April 2023 ah a tawp dawn a, tun term chhung hian CEM vawi 5 an inthlak tur a ni dawn a, tuna CEM hi vawi 2 an paihthlakna a ni bawk.
CADC ah hian seat 20 a awm a, MDC zawng zawngte hi an vaiin MNF vek an ni.
Post a Comment