Siaha, May 13, 2022 : Mara Student's Organisation (MSO) chuan MADC area chhunga hnalakah party induhsakna awm lova hna nei lo in pakhat atanga mi pakhat tal hnaa la turin MADC sorkar an ngiat.
Hemi chungchangah hian vawiin khan MSO Gen. Hqrs, Siaha chuan Siaha khawpuia Peace Rally an huaihawt a. MSO hruaitute chuan zirlaite dinhmun leh school dinhmunte zirchianin District Council hnuaia an thil duhte ngenna kawng zawh a nih thu an sawi a, 'One Family, One Job and Equal Education for All' tih thupui hmanga kawng zawh chu mipuiin an thlawp thain, zirlai thahnem tak an tel a ni.
MSO President Pu JB Rona chuan, tun dinhmunah MADC huamchhungah duhsaktu nei leh vote nei tam deuh chhungkua atangin mi 3/4 te sorkar hnaah an lut a, mi rethei duhsaktu nei lo tan luhna chance a awm lova, rualkhai taka chhungkaw tinin hna an hmuh theih nan kawng zawh huaihawt a ni tih a sawi.
MSO hruaitute chuan free leh fair taka hnalak a nih chuan sawi theih an neih loh thu an sawi a, hman atanga vawiin thlengin sorkar hnaah free leh fair taka an lut vek lo tih sawiin, lehkhathiam tam tak duhsaktu nei lo an awm a, chungho chuan hna an hmuh theih nan 'One Family, One Job' kalpui an ni tih an sawi.
Thingtlang school leh khawpui school inthlau lutuk chu a intluktlan theih nan te, private school leh sorkar school inthlau lutuk intluktlan theih nan te sorkarin hmasa la se an duh thu an sawi a, Mizoram sorkar chuan khawpui lam zirna ringawt ngaihtuah lova, thingtlang lam zirna pawh ngaihtuah se an duh thu an sawi a ni.
He Peace Rally-ah hian hnuaia branch hrang hrang atangin zirlai 500 vel an tel a ni.
Post a Comment