Siaha, May 13, 2022 : State Election Commissioner Pu Laima Chozah chuan sorkarna siam thei an awm loh avangin naktuk atangin MADC chu Mizoram sorkar kutah a awm tawh dawn a, inthlan chu hautak hle mahse intthlanthat a tul chuan Election Commission chu a inpeih reng dawn tih a sawi.

MADC inthlan a vote tlate hi May 4, 2022 khan chhiar a ni a, ni li lian hnu vawiin thlengin sorkarna siam thei an la awm lova, MDCC President Pu S. Hiato chuan vawiin an party thuneitu sang PAC thukhawmin eng party mah thawhho pui loh nise an tih angin party ang chuan tumah an thawhpui dawn lo tih a sawi a. Seat la tam ber chu BJP an ni a, sorkarna siam turin Larsapin a koh mai a rin thu a sawi bawk.

MADC ah hian vawiinni thlengin sorkarna siam thei an la awm lova, hetiang a nih zel chuan MADC chu Governor rorelna hnuaiah awmin Deputy Commissiner-in Council a enkawl ang a, sorkarna siam turin thla 6 chhung hun pek leh an ni ang a, hemi hun chhunga sorkarna siam thei an awm loh chuan inthlanthat neih a ni ang.

MADC inthlanah hian seat la tam ber BJP in seat 12 an la a, MNF in seat 9 la in, INC in seat 4 an la bawk. Sorkarna siam tura seat lak ngai zat seat 13 chu eng party mahni an lak loh avangin sorkarna siam tur chuan party pahnih thawhhona a ngai dawn a, MDC nei tlem ber INC in eng party mah thawhpui an tum loh thu an sawi avangin sorkarna siam tura inbiakremna a chiri phah hle a ni. 

Hetih lai hian Mara Autonomous Dist Council thutkhawm hmasa ber chu vawiin khan MADC protem chairman Pu K. Hrahmo kaihhruaiin  neih a ni. 

He MADC session hmasa berah hian party hrang hrang Legislature group leader ten lawmthu sawiin MNF atangin  Pu N. Viakhu, BJP atangin Pu M. Laikaw leh INC aiawhin  Pu H. Malvin-a  ten lawmthu an sawi a ni.

Chairman chuan inhmelhriattirna neiin 12th term MADC ah mithar 8 lai an awm thu leh MDC lo ni tawh tuna lo tling thar leh mi 3 an awm bawk a ti a, heng te hi an hming lama inhmelhriattirna neih a ni a, a bak 14 chu MDC nilai tling nawn leh te an ni. 

Pu K. Hrahmo protem chairman chuan member te hnenah lawmthu sawiin Governor-in Chairman  thlan hun  tur hriattirna an rawn chhuah  dawn a, chu chu nghah a ngaih avangin vawiin chawhma 10:55am ah tiam chin awm lovin thutkhawm a titawp a ni.

Post a Comment

Powered by Blogger.