Aizawl, May 6, 2022 : MJA General Headquarters, Aizawl President Pu C. Lalrambuatsaiha chuan vawiin May 6, 2022 chawhnu khan MJA member Pu Malsawmdawngzela Hrahsel, News Reporter, Vanglaini lehkhabu ziah, 'Kum 10 chhung Budget thlirna' tih chu Aizawl Press Club conference hall-ah a tlangzarh.

Lehkhabu tlangzarhna inkhawm hi MJA member Pu Lalnuntawma Fanai-in a kaihruai a, Pu Lalthlamuana Ralte, Assistant Professor, Pachhunga University College-in lehkhabu thlirlawkna hun a hmang. Mimi Renthei-in kalkhawmte zaiin a awi a, MJA President bakah, kalkhawmte zinga mi eng emaw zatin thu an sawi. 

MJA President chuan, MJA member zinga mi Pu Malsawmdawngzela Hrahsel-in lehkhabu hlu tak a sual chhuak chu lawmawm a tih tak zet thu a sawi a, "Kan ram mamawh tak lehkhabu a tichhuak thei hi kan lawmpui a, a dang pawh la tichhuak zel turin ka chah a ni," a ti.

Pu C. Lalrambuatsaiha chuan, "Lehkhabu tihchhuah hi a harsa, finance leh budget lam phei chu a harsa leh zual. Hetiang lehkhabu hi Mizoten kan la nei mang lo a, he lehkhabu hi Mizo hnam tan a \angkai tak zetin ka ring. Budget hi thil har tak a ni a, MJA-te pawhin kan zir fé a ngai thin a ni," a ti a; mithiam tam tak pawhin budget chu an zir fe \hin thu a sawi.

'Kum 10 chhung Budget thlirna' tih lehkhabu hi kum 2013-14 atanga kum 2022-23 thlenga kum tina Mizoram budget thlirna a ni a; phek 117-a chhah niin, Rs 130 man a ni.

Tlangzarhna inkhawmah hian IPR Minister Pu Lalruatkima, MLA dang pahnih Pu C. Ngunlianchunga leh Pu Lalrindika Ralte bakah, sorkar officer te, MJA member-te leh political party mi eng emaw zat an tel a ni.

Post a Comment

Powered by Blogger.