Aizawl, May 6, 2022 : Mizoram Journalists' Association (MJA) General Headquarters, Aizawl huaihawtin vawiin May 6, 2022 (Zirtawpni) chhun dar 12:00 khan Aizawl Press Club conference hall-ah MJA member zinga MAL Book of the Year 2021 dawngtu Pu Lalhruaitluanga Chawngte, News Editor, The Aizawl Post lawmpuina hun hman a ni.
Book of the Year 2021 'Hnam ropuite u, tho r'u le' tih ziaktu Lalhruaitluanga Chawngte lawmpuina inkhawm hi MJA Gen. Hqrs. Vice President Pu Lalremsiama'n a kaihruai a, Prominent Journalist Pu C Dinthanga'n hunserh a hmang a, MJA President Pu C. Lalrambuatsaiha leh lehkhabu ziaktu Pu Lalhruaitluanga Chawngte ten thu an sawi.
MJA President chuan, mi tam takin diary pawh an ziak tha peih lo hlawm a, lehkhabu ziah phei chu thil harsa lehzual a nih thu a sawi a, "Kan member Hruaitea lehkhabu kum 2021 chhunga lehkhabu chhuak 170 chuang zingah a \ha bera an thlang hi kan lawmpui tak zet. Mizo literature khawvelah a thawh hlâwk berte zingah a tel niin ka hria a, Mizo hnam leh literature tan fa hrin man awm tak a ni. Mihring hian talent hrang hrang kan nei a, literature huanga tâl tur hian Pathianin Hruaitea hi a dah niin ka hria. Chu lam kawng chu zawh zel se kan duhsak a. Sum leh paia hlâwkna a tam lo pawh a ni mai thei, mahse, ram leh hnam tan a hlu a ni. Thih hnu pawha thu leh hla \ha hnam tana hnutchhiahtu a ni," a ti.
Pu C. Lalrambuatsaiha chuan, Lalhruaitluanga Chawngte chu M.A (Literature) a nih avangin Sap \awngte pawhin lehkhabu ziak thei turah a ngaih thu leh ziak ngei se a duh thu a sawi a, "A hlawhtlinna kan lawmpui a, a thlen chin hi kan chhuang. Tuna a thlen chinah hian duh tâwk mai lo se, sang zawk thleng turin ziak chhunzawm zel se," a ti a; Mizote'n thuziak mite an ngaihhlut thiam zel a, an kutchhuakte an hlut zel a pawimawh thu a sawi.
Lalhruaitluanga Chawngte pawhin thu sawiin, Pathian malsawmna a dawn nasat thu a sawi a, "Book of the Year hi ka beisei miah loh a ni a, kan rilruah a lang pha lo a, ka insit hial zawk a ni," a ti a; Book of the Year a dawn MJA-in a lawmpui avanga a lawm thu sawiin, "MJA member satliah ka ni a, MJA tan \angkaina ka nei lo. MJA-a ka \hiante zawng zawng chungah ka lawm tak zet. Chanchinbua ni tina thu kan ziah hian min pui nasa a, chanchibhua thiam lo chung chunga ka awm ve hi ka hlâwkpui tak zet a ni," a ti.
MJA chuan Pu Lalhruaitluanga Chawngte hnenah hian Book of the Year a dawn lawmpui nan thuchei (certificate) leh Rs 10,000 a hlan a ni.
Post a Comment