Lawngtlai, May 24, 2022 : Central YLA chuan District Hospital, Lawngtlaia Doctor thawklai transfer order chu sut tur leh Mizoram sorkar an lo dil tawh anga District Hospital Lawngtlai Doctor Specialist pali dah tur leh Lawngtlai District khawthlang lam khaw 97 te'n an pan ber thin Bungtlang PHC-a Medical Officer (District Hospital,Lawngtlai-a thawk lai ni lo) dahsak turin Mizoram sorkar an ngen.
Central YLA hian nimin khan Lawngtlai Press Club-ah an President Pu Hc. Vanlalruatpuia hovin thuthar thehdarhtute an kawm a, CYLA chuan District Hospital Lawngtlaiah doctor indaihlohna a nasat avangin Mizoram sorkarah ngenna vawi tam tak an thlen tawh tih an sawi a. An ngenna leh dilnate chu tihhlawhtlin sak lo mai pawh ni lovin May 20, 2022 khan District Hospital, Lawngtlai-a Doctor pahnih Dr. Andrew Khawlthangpuia, Grade-II leh Dr. Paul Lalchung-nunga, Grade-II te chu an aiawh dah lovin hmundangah sawn an ni a, Dr. Zothanpari Chhakchhuak, Grade-I leh Dr. Lalmalsawma, Grade-II te chu May 23, 2022 khan transfer an ni leh bawk tih an sawi a. Heng Doctor pali (4) hmundanga transfer-te aiawh hian Doctor pathum (3) rawn dah nimahse, tun dinhmunah DHL ah hian doctor 7 chauh an awm dawn tihna a ni a, a lungawitlak loh takzet a ni an ti a. Kum 2020 khan District Hospital, Lawngtlai-a Doctor pathum - Dr. Chicky Azyu (Pediatrician), Dr. B. Lalduhawma (Gynaecologist), Dr. Vanlalremsiama (Surgeon) te chu an aiawh dah miah lovin transfer an lo ni tawh bawk tih an sawi.
Central YLA chuan thawktu indaihloh avangin khum 50 awm theihna District Hospital Lawngtlaiah khum 30 chauh a awm tih an sawi a, Lawngtlai District aia mihring cheng tlemna District dang, Kolasib-ah Doctor 17, Champhai-ah 14, Mamit-ah 11 leh Serchhipah 9 awmte nena tehkhin phei chuan Lawngtlai District-a Doctor awmte hi an tlem takzet a ni an ti a, hetiang dinhmuna kan awm hnua District Hospital, Lawngtlai ti changtlung zawng ni lova a heu zawnga Doctor min transfer sak hi Lawngtlai District mipuite hmuhsitnaah kan ngai a, na kan ti hle a ni an ti bawk.
Central YLA chuan an ngenna ngaihpawimawh a nih a, an harsatna chinfel thuai a nih theih nan May 25, 2022 (Nilaini) atangin Lawngtlai khawpui chhung leh Bungtlang South hmunahte Picketing a huaihawt an rel a. Hemi hunchhung hian Sawrkar Office, School leh Company hnathawkte thlengin hnathawk thei lo tura dan an ni ang.
Post a Comment