Pangkhua, May 9, 2022 : Nimin tlai dar 3 vel khan Chin Defence Force te chuan YLA Pangkhua Branch chuan an humhalh lai ralvenchhuah tuipuiah bomb an vawm tih report hriain, YLA Pangkhua Branch te chu a hmunah an chhuk.
Tlangkama thu hriat danin CDF te hian Ralvenchhuah thlang Lungdar tuipuiah bomb-in Sangha an vawm a, an man loh avangin Pangkhua mite chu an sangha lei an dil a, pawisa inanloh avangin an inlei thei lova, hemi thinrim hian humhalh lai Ralvenchhuahah hian bomb an vawm niin an sawi.
Pu Marka, YLA Pangkhua Branch President chuan hei hi thu dik lo a nih thu sawiin, CDF te hian humhalh laiah hian bomb chu an vawm ngei a, Myanmar sipai do lai an nih avangin an bomb siamchawp an test a nih thu a sawi.
YLA humhalh laia CDF ten bomb an vawm avang hian YLA Pangkhua Branch te hi Ralvenchhuah lamah an chhuk thla nghal a, CDF hotute nen hian Myanmar lamah an inbia.
An inbiaknaah hian YLA Pangkhua Branch hruaitute chuan Ralvenchhuah chu an humhalh lai niin, an ei bel ber a nih thu an sawi a, an humhalh theih chhan pawh helai tlang dung, Bungtlang leh Siallam ten an zahder sak avang a nih thu an sawi a. Bomb an vawma hremna an pek dan thinte pawh an sawi bawk. CDF te chuan hmannia Myanmar sipate nen an inkahnaah an sipai mi 9 an chan thu an sawi a, hemite sun tura Bungtlanga rawn kal an nih thute, an sipaite chu tuipui lamah intihlim turin an kal thu leh an bomb pawh an test thu an sawiin, sangha man tum pawh an nih loh thu an sawi. An commander hova rawn thawk chhuak CDF hotute chuan humhalh laia bomb an vawm chu an thiam loh a nih thu leh pawisa pawh chawi a ngaih chuan chawi an hreh loh thute, mahse, chutiang em a thlen loh hram an duh thu te YLA Pangkhua Branch hruaitute chu an hrilh a, ngaihdam an dil a. CDF hotute chuan an awp chin area-ah Ralvenchhuah humhalhna kawngah theihtawp chhuahpui an tum thu te, khaw 50 ah thuchhuah an siam nghal tur thu an sawi bawk.
YLA Pangkhua Branch hruaitute chuan CDF thusawi atangin an tum reng avanga bomb vawm an nih loh thu leh, rambuai an ni a, chau leh lusun lai an ni a, an tawrhna hriatthiampuiin, rilru intihnat a tha love tiin an inhrethiam tlang tih an sawi.
Post a Comment