Lawngtlai, May 23, 2022 : Additional Deputy Commissioner, Lawngtlai Pu James Miahlung hovin vawiin khan Lawngtlai DC Conference Hall-ah Lawngtlai District chhunga puaktheithil hman phalna nei (explosives licence holder) leh silai leh a mu zuar (arms & ammunition dealer licence holder)-te an ṭhu khawm a. Dan leh hrai leh hriat tur pawimawh hrang hrang inzirtirna leh sawi hona hun an hmang.
Pu James Miahlung chuan sawrkar laipui thu chhuak anga ṭhut khawm chu buatsaih a nih thu sawiin, puaktheithil leh silai chu a duh tana hman sual theih leh pawi khawihna atana hman theih, ram chhung ralmuanna tichhe thei a nih thu a sawi a, licence holder kal khawmte chu an mawhphurhna a sanzia leh fimkhur a ṭul dan hrilhin, danin a phal chin leh dan ang taka an licence chu hmang turin a chah a ni.
Lawngtlai Sub-Divisional Police Officer Pu Beimosia Lapi chuan Explosives Acts, 1884, Explosives Rules, 2008 leh Explosive Substances Act, 1908 te sawifiahin, puaktheithil leh silai hman leh zawrh chungchanga hriat tur pawimawh leh dan bawhchhia hremna dan hrang hrang a sawi a. Sub-Deputy Commissioner Pu H. Vanlalbiakzauva chuan office aṭanga licence an pek chhuah ṭhin dan report a pe bawk.
He hunah hian licence holder-te chu an licence original copy kenga kal khawmin, an stock dinhmun report an pe a. Felfai taka District chhunga puaktheithil leh silai hman leh zawrh a nih theih nana thil pawimawh hrang hrang sawi ho a ni.
Lawngtlai District chhungah hian tun dinhmunah puaktheithil hman phalna nei (explosives licence holder) mi 14 awmin, lung lakna (quarry)-a hman tur a ni tlangpui a. Silai leh a mu zawrh phalna nei (arms & ammunition dealer licence holder) mi 2 an awm thung.
Post a Comment