Lawngtlai, May 23, 2022 : Lai Student's Association, General Headquarters; Lawngtlai chuan District Hospital Lawngtlaia doctor indaihlohna a nasat em em lai leh thawktu dang dah belh tura Mizoram sorkar dil a nih mek laia District Hospital Lawngtlai doctor pahnih, an aiawh pawh dah lova sawnchhuah tumna awm chu sut let emaw an aiawh dah turin Mizoram sorkar an ngen a, doctor pahnih sawnchhuah tur pawh Lawngtlai chhuahsan rih lo turin an hriattir bawk.
LSA Gen. Hqrs., Lawngtlai chuan Health & Family Welfare Department, Gov't of Mizoramin May 20, 2022 khan District Hospital Lwangtlaia doctor pahnih Dr. Andrew Kawlthangpuia, Grade-II leh Dr. Paul Lalchungnunga, Grade-II te chu an aiawh dah lovin transfer order a tichhuak tih an sawi a. Kum 2020 khan Dr. Chieky Azyu (Pediatrician), Dr. B. Lalduhawma (Gyanaecologist) leh Dr. Vanlalremsiama (Surgeon) te chu an aiawh dah lovin transfer an lo ni tawh tih an sawi bawk.
LSA Gen. Hqrs., Lawngtlai chuan doctor indaihlohna a nasat laiin kan doctor neih tlemte zinga mi atanga sawnchhuah tumna chu hriatthiam har an tih thu an sawi a, hetih lai hian doctor transfer & posting hrim hrim chu an dodal lo tih an sawi bawk.
Mi rethei leh harsa te pan nasat em em District Hospital Lawngtlaia tihchangtlung lam hawi lova, thawktu tlem kan neih chhun pawh an aiawh dah lova lakchhuah tumna awm chu LSA chuan sut emaw an aiawh dah turin sorkar an ngen a, doctor pahnih transfer turte pawh sorkarin an aiawh dahna emaw ruahmanna fel tak a awm hma chuan Lawngtlai chhuahsan lo turin an hriattir bawk a ni.
Post a Comment