Lawngtlai, May 23, 2022 : May ni 20, 2022 (Zirtawpni) khan Lawngtlai District Deputy Commissioner (DC/Bawrhsap) thar Pu Amol Srivastava, IAS chuan Dr Andrew H. Vanlaldika hnen aṭanga charge lain Lawngtlai Bawrhsap hna a zawm fel.
Pu Amol Srivastava hi Uttar Pradesh state-a Noida khaw chhuak a ni a. Vellore Institute of Technology aṭangin B.Tech (Mechanical Engineering) a zo va. Jawaharlal Nehru University aṭangin Public Policy Management-ah Master degree a nei bawk. Kum 2018 batch AGMUT cadre Indian Administrative Service officer niin, Mizoram sawrkara Commerce & Industries Department leh Taxation Department Additional Secretary aṭangin Lawngtlai DC-ah hian lo sawn a ni.
Bawrhsap thar chuan Lawngtlai District mipuite chibai a buk a, District hmasawn nan theih tawp chhuah a tum thu sawiin, District mipuite, tlawmngai pawl, kohhran, district council leh sawrkar department hrang hrangte ṭawiawmna leh thawhpuina ngenin, a ṭulna apiangah fin chhuah ṭhin turin a chah a ni.
Post a Comment