Siaha, April 30, 2022 : MADC inthlan campaign chuan a vawrtawp a thleng chho mek zel a, ZPM Party pawhin campaign beihpui thlak chhunzawm zelin, nizan leh tukin lamah te hmun hrang hrang vantlang inkhawm buatsaih a ni. Tukin Siaha khawpuia vantlang inkhawm buatsaiha thusawitu, Pu TBC Lalvenchhunga, ZPM MADC Election Campaign Committee Chairman chuan, “ZPM in chhim tawp kan thleng tih Party dang ten mit ngeiin an hmu ta,” a ti.
Pu TBC Lalvenchhunga chuan, “Party dangte min beih fo thinna chu ‘ZPM chu chhim lam bialah engmah an ni lovang, an tan tihngaihna a awm lo, tih a ni thin a. Tunah chuan an mit ngeiin ZPM in chhim tawp kan thleng tih an hmu ta a. Hei hian a ti mangang niin alang a, Minister thenkhat campaign te chuan candidate kan neih lohna bial thleng thlengin ZPM bak beih tur an hre tawh lo,” a ti.
TBC Lalvenchhunga chuan, “ZPM chuan midangte sawisel emaw an thatlohna sawi ngai lovin, kan din chhan hi Mara ram mipui hian an chiang tih kan hmu a. Candidate leh Unit kan neih lohna hmunah pawh kan hruaitute an kal chuan thu tawi te tal sawi tura ngenna kan dawng hnem hle a. Kan kalna apiangah Mara mipuite’n min hmangaihin kan hma hun min thlirthiampui hle a, thawhhona tha tak kan nei zui zel dawn tih a lang a ni,” a ti a. Kalphung Thar, Mipui sawrkar din turin theih tawp kan chhuah zui zel dawn a ni, a ti bawk.
Post a Comment