Lawngtlai, April 25, 2022 : Vawiin, April 25, 2022 khan Pu Sanghuliana Mualchin Chairman Town Committee LADC chuan Lawngtlai khawpui chhunga Service Provider-te chu an thu rel bawhzuina kalzelah Lawngtlai Areopagi-ah kokhawmin, Bazar VC leh YLA te nen YLA Bazar Branch Committee Room-ah Lawngtlai Bazar area chhunga Cable TV, Internet Connection leh Telephone, Electric hrui inzam dan chungchangah mumal zawka hmalak tan dan tur an sawiho.
Meeting kaihruaitu Pu Sanghuliana Mualchin, Chairman, Town Committee, LADC chuan kumin hi LADC Golden Jubilee kum a nih avang leh Lawngtlai chu District Headquarters a nih avangin Lawngtlai khawpui chhung a lo thianghlim zawk nan leh khawpui thang zelah harsatna kan tawh loh nan hmalak a tul thu a sawi a. 'Lawngtlai khawpui chu a chhunga chengte ngei hian hma a sawn theih nan theih tawp kan chhuah a ngai a, Pu V. Zirsanga, CEM LADC pawhin Lawngtlai khawpui thianghlimna tur leh hmasawnna tur hi a vei hle a. A kaihhruai sorkar chuan theihtawp chhuahin hma kan la zel dawn a ni' a ti.
He hun hmanpuitu Pi L.Lalnghakliani, SDO Electric Department chuan Electric hnawk zual an thenfai dan te sawiin, tunah phei chuan ABC Wire-in an theih chinchinah an thlak tawh thu a sawi bawk a. Service Provider dang nen Electric ban an inthlun zawm dan leh harsatna an tawh dante an sawi a, inrawn khawmna leh hmalakho dan sawihona hun a awm chu lawmawm a tih thu an sawi bawk.
He huna tel Service Provider-te bakah Lawngtlai Bazar VCP te chun hma an lo lak tawh dan leh rawtna an neihte bakah, a tul dan anga hmalak pui zel an in huam thu an sawi.
Pu Sanghuliana Mualchin chuan Lawngtlai Bazar an tih fel hnuah hian Lawngtlai veng hrang hrangah hmalak chhunzawm zel an tum thu a sawi a, hruizam tur chuan an hmalakna hrerengin hma lo la tawh thin turin Service provider-te chu a ngen nghal bawk.
Meeting neih zawh hian Lawngtlai Bazar chhunga hrui inzam dante enkualin hmalak zel dan tur an thlirho a, a hmalama hmalak tan nghal a ni ang.
Post a Comment